RAMTHAR NI MIZORAM PRESBYTERIAN KOHHRAN TANA NI PAWIMAWH BIK

Kohhran êntu : The 28th August, 2016 (Pathianni) : August 31 hi Ramthar Ni a ni a. A bîk takin kan Kohhran tân phei chuan ni pawimawh bîk tak a ni ang. I lo thlîr zau teh ang :-

August 31 hi Mizoram Presbyterian Kohhran rawn dintu Rev. David Evan Jones (D.E. Jones – Zosaphluia), Mizoram-a rawngbawl tura a lo thlen ni a nih avàng a ni. Kum 1972 Mizoram Synod Inkhâwmpui chuan, Synod Ramthar Board-in, “August ni 31, Pu Zosaphluia Mizoram-a a lo thlen ni hi Synod Ramthar Ni atan hman nise,” tia a rawtna chu pawmin kum 1973 atang khan August 31 chu Ramthar Ni atân hman tan a lo ni ta a ni.
Mizoram-a Chanchin tha rawn thlentu hmasa ber (Pioneer Missionary) Rev. William Williams chuan Khasi rama a thawh laiin Syhlet lama Mizo lung in tángte hnên atanga Mizote chanchin a lo hriatin Mizoram-a kal duhna a nei ta a. Kum 1891 March ni 20 khan Aizawl-ah a lo kal a, Mistiri leh kut hnathawka inhlawhfate hnênah Pathian thu hrilhin track-te a sem a. Mizoram chanchin hi Welsh ramah a zu sawi a, Welsh Presbyterian Mission chuan kum 1892-ah Mizoram chu Missionary tirh luhna atân a thlang ta a.
Rev. William Williams hi tirh an tum a; mahse, vànduaithlâk takin a thi ta mai si a. Mi tharte an dap leh a; Theological College-a an zirtîr chhûngin hun a lo vei hman a. Hetihlai hian Arthington-a mi tirh Rev. F.W. Savidge (Sâp Upa) leh Rev. J.H. Lorraine (Pu Buanga)-te kha an lo chhuak a. Kum 1894, January 11-ah Mizoram an lo thleng a; Welsh Presbyterian Mission tirhin Rev. D.E. Jones (Zosaphluia) hi kum 1897, August 31-ah a lo thleng ve leh ta a ni.
Mizoram Presbyterian Kohhran chuan kumin Ramthar Ni pual hian tum khat inkhâwm atân programme a siam a, thupuiah ‘Krista thuhretu nih’ (Tirhkohte Thiltih 1:6-8) tih chu a thlang.


CHANCHIN TAWI
@ Br. KTP sumtuak nana neih thil / thiam thil thehkhâwm tlawmngáia tlantute’n a man kha ngaihven nise.

@ Aug. 28 (Sun) chawhnu inkhâwm bàn hian Kohhran Committee Room-ah KTP thlatin thawhlàwm chhiar tur a ni a, member-te committee neih pah tur a nih avàngin kim taka kal nise.

@ Aug. 20 (Sat)-a KTP te’n sumtuak nana lirthei sila kan inhlawhnaah, a bul vel in neitute leh lirthei thawhtu zawng zawngte chungah làwmthû kan sawi tak meuh meuh a ni.

@ Tv. Vànlalsàilova hova KTP te’n hun kan hman tur chu October 3, 2016 (Thawhtanni) zàn a rem thu dawn a ni.

@ Keifáng Branch tlawh tura kan inbuatsaih mêk chu Keifáng Branch lam chu an remchàn thu dawn a nih rualin an Kohhran Committee lamah thu an la thlen ve leh dáwn a ni.

@ NPSS Inkhâwmpui/Meet kan hnaih ta hlê mai a, Department lam pawh theih ang angin kan tang tlâng a. Hetihrual hian, a zirtîrtu ngâi te’n an bei ngawr ngawr bîk hi a dik ber em? Kan zirtîr thiam loh pawhin lo tàwiàwm talte tum ila!

THUVAWN : Marka 1:15
“Hun chu  a lo thleng ta a, Pathian ram pawh a lo hnai ta; sim ula, Chanchin tha hi ring rawh u,” a ti zêl a.

EDITORIAL
Pathian hruainain kum 2016 Beihrual Thla kan lo thleng leh dâwn ta reng mai. Pathian hnênah lawmthu i sawi ang u.
Kumin chu kan Kohhran hruaitute’n Biak In lama hun hman vek relin ruahmanna an siam a, September thla pumpui chu Biak In lama hun hmang vek thei turin i inuatsaih ang u.
Kum danga kan hman dan tlangláwn ber chu Kohhran In tina inkhawm thinte a ni a, Kristian Chhungkaw Hapta bika Kohhran In tina inkhawm te a ni bawk a; tin, tumkhat chu KTP, Kohhran Hmeichhia leh Kohhran Pavalai Pawl-te inkhawm bikah chuan an inkhawm bikah thupui awm sa kha lo zirin a dang zawng chu Kohhran inkhawm pangngaia hun hman a lo ni tawh bawk.
Hman dan tur bik a awm chuang lo naa, kan Kohhran dinhmun enin Beihrual Thla inkhawm hi tihdanglam thin a ni.
Kuminah chuan Biak In lamah vek hun hman a ni dawn a, Fellowship leh tih bik pawh awm lovin, Kohhran inkhawm tawpin a kal dawn a ni a, kan tifuh a nih chuan kan hlâwkpui leh hle turah ngai ila.
Hetihrual hian, NPSS Inkhawmpui thla a nih ve avangin zan lama hla zir tur awmte avang erawh chuan kim a har viau ang.

Thu leh hla
RAMTHAR NI THUCHAH

‘kei heta hi ka awm, mi tîr ta che’

– Rev. Lalbiakhlîra

Isaia hi mi huaisen tak chu a ni phawt mai. Pathian a hmu chiang tih a lang bawk. Chuti ni suh se, he thu, “Kei heta hi ka awm, mi tîr ta che,” tih ngam chi a ni lo!
Pathianin a zàwlnei turin a ko va, Temple-ah inlàrna a hmu a. Chu chu Lal Uzia thih kum, 742 BC-ah khan a ni a. Pathianin a kohna hmun hi Temple a ni tlat mai hi a mak lo. Pathian ngainatute hian Biak In an bêl thin a, chutiang mite chu a ko duh bik ni pawhin a lang.
Inlàrnaah chuan Pathian aw chuan, “Tunge ka tirh ang a, tunge ka tân kal ang?” a ti a. Isaia chu inngaihtuah buai hauh lovin a inpe nghâl mai niin a lang a, a ropui tak zet. Kalsan tur, chàn tur, tawrh tur a tamzia a hre awm si a. Mahse, “Ka chhung te, ka eizawnna, ka sum hnâr, ka thian te, ka nuam tih zâwng..” tibuai lovin a chhâng tawp thei tlat. Keini hian engtin nge kan chhàn ve ang le?
A hnà lah chu a namai lo, huaisen ngái tak a ni. Hetihlai hian, Israel fate’n Lalpa an hnâwl a, milem pathiante an bia a, thing leh lunga siam milem pathian hnênah an inthâwi a. Ram hruaitute pawhin ram dang mite nen insiamremin chhiahte an pe a, Pathian an bêl tawh lo.
Lalpa chu Aigupta bâwi ata hruai chhuaktu a nih an theihnghilh a, Mosia leh mipui hnêna dàn a pêkte pawh an zàwm lo va. Lalpa erawh chuan amah chauh bêl turin a phût a. Chu thu chu Lalpa leh mipui hriattir turin a ko a ni. An sualte sim a, Lalpa lam hawi turin an hrilh ang a, an sim loh chuan hremna hrilh turin koh a ni a. Isaia chuan, “Kei eta hi ka awm, mi tîr ta che,” a ti a nih chu.
Tunlai kan ram dinhmun thlîr hian Lalpa ram a tlusawp mêk niin a lang a. Sawrkar hruaitute pawhin mipui hnênah Bible duh loh zû min hlui ta mai te, Lalpa mite intêlkhâwm ‘Kohhran’ sawisêla bei duh kan awm ta mai te, inkhâwm peih lo kan tam te, Pathian malsàwmna kan dawn ama rawngbàwl nana thehchhuak ui tlatte pawh ringtu zingah kan pung ta em ni? Krista rinna phatsana pâwl chhuak duh mai te, Pathian rawngbàwl hna thawh aia nihna buaipui tâwk kan tam nia langte hi a dik a nih chuan Lalpa lung a áwi dawn lo.
Zofate min hmangaih a, ramhuai hlauh tlawna inthâwi thin, thingbul lungbul be thin kan nihna ata min hruai chhuak a, rambuai laka min chhanchhuaktu hi kan theihnghilh palh ta mai em ni? Kumtin ram vâta insuan reng, ei khawp tâwk tâwk thawk chhuak thin, mikhual pawh huphurh thinte chu eizawn dàn dang tam tak min pe a, malsàwmnaa min vûrtu hi kan tlansan a remti lo.
Kan ram pâwnah pawh Krista hre lo tam tak an awm bawk a. Thawh tur hna a va tam em! Ringtute hi Lal Isua rawngbàwl hna chhunzawm tura a kohte vek kan ni a. Kan ramah Pathian ram din thar tur leh Krista hre lote hnêna hriattîr turin Lalpa’n min ko ve mêk a ni. Isaia angin Pathian aw kan hre kher lo a ni mai thei a, Bible kan chhiar chuan min kohna a va tam êm!
Ringtute hi Kristaah rawngbáwl tura chhandamte kan ni vek a. Khawvêl zawng zawnga kal a, thilsiam zawng zawngte hnêna Chanchin tha hril tura tirh leh hnamtin ami zirtîra siamtu tura a lohte kan ni vek a. Sual dova thisen chhuak khawp, nunna hlàn khawpa tang tura fuihte kan ni a. Kan dam chhung rei lote chu làwmna chhe thei lo, chatuan nunna nen khaikhin tham a nih lohzia hre chiang chunga Lalpa rawngbáwl tura siam leh din kan ni a. Amah avànga nunga che-a awm mai kan ni a. Khawvêl thil chhe theia rilru dah lo tur leh mikhual châm mai, haw leh vek tur kan nihzia thlengin kan theihnghilh palh ang e.
Chutiang hre chiangtute’n Biak In an bêl a, Kohhran an ngaisang a, an thlahthlam phal ngai lo va. Thawhchhuah theihna, hriselna, thlai thantîra malsàwmtu, muttuina, eituina, thluak fim, duhthlan theihna min petu chu Lalpa Engkimtitheia chauh a ni a sin! Chil hâka thi thut theite hian, “Kei heta hi ka awm, mi tîr ta che,” kan ti thei lo ang maw?
Zawlnei Isaia anga hna zuamawm loh tak thawk turin pên chhuak la, intihuaisen rawh. Nangmahin i thawk dawn lo. Tho leh Krista’n Petera hnenah, “Mi zui rawh,” a tih chu a chhâng a, Thlarau Thianghlimin a thuam ta a, engmah a hlau tawh lo. Mi liante pawhin an khap hneh tawh lo va, an man hnu pawhin Lal Isua khenbeh ang ni lo, a letlinga khenbeh a dil ta hial a sin! Hlauh tur kan nei ve lo.
Lalpa’n, “Tunge ka tân kal ang a, tunge ka tirh ang?” tiin min zâwt mêk. Engtinnge kan chhàn dáwn le?

SYNOD BOOKROOM NEWS
August thla chhûnga Synod Bookroom-a lehkhabu chhuak thar leh lei theihte :-
1) Bible ram mite khawsak dàn  – Rs. 100/-
2) Pathian tâna alh chhuak – Rs. 150/-
3) Kalvari kawng – Rs. 30/-
4) Pathian khawngaihna mak – 50/-
5) I nakin hun ngaihtuah rawh – 40/-
6) Nun thlalêr – 80/-
7) Ethel – 150/-
8) Zalenna ram – 200/-
9) Intodelh nan vawk vulh – 120/-
10) Thingtláng hmasâwnna tur kàilàwn – 100/-
11) Mizo Tawng Grammar leh Composition – 80/-
12) Hla Thu Dictionary – 400


SYNOD RELIEF FUND
Tûn hnâia harsatna hrang hrang neite hnêna Synod Relief Fund atanga chhawmdàwlte :-
1. Chalráng – Hrawk Cancer – Rs. 5,000/-
2. Váivakàwn – Khawsak harsa – Rs. 6,000/-
3. Hlimen Dàmvêng – Che thei lo – Rs. 4,000/-
4. Tuipui ‘D’ – Khawsak harsa – Rs. 4,000/-


SEPTEMBER THLA CHANVO NEITU
Meeting Chairman : Upa Lallianzâma
Zái hruaitu :
Dt. 1 – 11.9.2016 : Pu Chhuanváwra &
Pu A. Lallàwmsánga
Dt. 12 – 18.9.2016 : Pu Vànlalchhuanga &
Pu H. Lallàwmsánga
Dt. 19 – 25.9.2016 : Pu Ramsanga & Pu Zosiama
Dt. 26 – 30.9.2016 : Pu Chhuanváwra &
Pu A. Lallàwmsánga
Pianist :
Dt. 1 – 11.9.2016 : Tv. Zárzokima
Dt. 12 – 18.9.2016 : Tv. Pàchhûnga
Dt. 19 – 25.9.2016 : Tv. Lalkhawmawia
Dt. 26 – 30.9.2016 : Tv. Lalawmpuia Hauzêl

Thawhlàwm khawntu :
  1) Nl. Lalruatfeli
2) Nl. Zoramchhuani
3) Nl. Zonunmawii
4) Nl. R. Lallàwmkimi


KOHHRAN HMEICHHIA
Dt.30.8.2016 : Thawhlehni zàn
Hruaitu : Pi C. Lalbiakthuami
Tantu : Pi Laldinpuii
Thusawitu : Pi Chawngmáwii


PROGRAMME

Dt.28.8.2016 : Pathianni Sunday School
Tantu : Pu Lalthakima
Zirlai : ‘Thlarau rah’

Dt.28.8.2016 : Pathianni chawhnu
Thusawitu : Upa Lalhmuchhuaka

Dt.28.8.2016 : Pathianni zàn
Thusawitu : Upa Chalhnûna

Dt.31.8.2016 : Nilaini zàn (Ramthar Ni)
Chairman : Meeting Chairman
Thupui : ‘Krista thuhretu nih’
Sawitu : Pastor C. Sâpkáia

Dt.1.9.2016 : Ningàni zàn (Beihrual Tan zàn)
Chairman : Meeting Chairman (Pastor)
Tantu : Pi Lalsangpuii (B-6)
Thupui : ‘Kristian nundan tur – I’
Hawngtu : Pi Vànlalzawmi

Dt.2.9.2016 : Zirtàwpni zàn
Chairman : Meeting Chairman (Pastor)
Tantu : Pi Lianthangpuii
Thupui : ‘Kristian nundan tur – I’
Hawngtu : Tv. Lalkhawmawia

Dt.3.9.2016 : Inrinni zàn
Chairman : Meeting Chairman (Pastor)
Thupui : ‘Kristian nundan tur – II’
Sawitu : Tv. F. Laltlanhlûa

Dt.4.9.2016 : Sunday School
Tantu : Pi Rohmingliani
Zirlai : ‘Thlarau Thianghlim – Tirhkohte’

Dt.4.9.2016 : Pathianni chawhnu
Hun hman dan : Lalpa Zanriah Sakramen
Thehtu : Pastor C. Sâpkáia

Dt.4.9.2016 : Pathianni zan
Chairman : Meeting Chairman (Pastor)
Thupui : ‘Tawngtai dàn dik’
Sawitu : Upa Vànlalzuia

KRISTIAN THALAI PAWL
Dt.29.8.2016 : Thawhtanni zàn
Hruaitu : Tv. F. Laltlanhlûa
Committee Member
Tantu : Nl. Malsàwmdawngkimi
Upa Kûtdênga Group
Thusawitu : Pu Lalêngmawia
Bible reading : Nl. Lalpármawii (B-8)
Special Item : Upa Kûtdênga Group
Zai hruaitu : Tv. Lalruatkima
Musician : Tv. Zârzokima
Tv. Vànlalnghâka
Tv. Zonunkima
Tv. C. Lalruatfela
Thawhlàwm khawntu
: Nl. Lalchhanhimi &
Nl. Lalêngzámi

NAUPANG PUAL
An lohna point 7 han zawng teh. I hmuh chuan rawn thâi bial kalh rawh le.. Chhâng dik zînga vànnei ber làwmman pêk a ni ang.Chhuak hmasa làwmman dawngtu -
Lalruatmawii, Kum 10 (Bial 2-na)

KOHHRAN ZAIPAWL HLA THAR
Kohhran Zaipawl Music Video siam tura tih chu a hla thlâk a ni a, Apostol’s Creed – ‘Engkimtithei Pa Pathian’ tih leh ‘Chhandamtu hmangaihna ka hria’ tih chu Medley tur a ni a, August 28, 2016 (Pathianni) zàn inkhawm bànah zir tan tum a ni. Member a tam thei ang ber hla zir turin kan insáwm a ni.

KTP INKHAWM DAN
August 22, 2016 (Mon) zan KTP inkhawm dan :-
Upa Pêngthangvunga Gr. : 12
Upa Kûtdênga Gr. : 12
Upa Thangkima Gr. : 16
Upa Rokûnga Gr. : 8
Junior Gr. : –
Mi dang : –
Total : 48
Thawhlawm : 740
Mi 1 thawh dan : 15

THLIRNA
Vawi khat chu dàwr pakhatah hian nu pakhatin, “KTP-te hi hla in thiam lo lutuk, kan hla sak khàtte an thlanin sak ngaihna rêng rêng in hre lo mai!” min ti chiam mai a, insawifiah ve pahin thiam ang tâwkin ka chhâng ve a!
Ni. KTP-te hi Kohhran Kutke ni tura din kan ni a, kan thiltum 4 zingah a tel nghe nghe a, hmasawn tur leh zir tur kan la ngah khawp mai.
Amaherawhchu, thlirna tláng dang atangin lo thlir ve ta ila –
Dik tak chuan, a harsat chang a tam ve thin a sin! Kan Kohhran Pathian biak inkhawm hi ngun takin chhût ila, kan hla sakte hi a ngai hlir 10 bawr velah kan kual kan kual a, engtin nge kan thiam thei bik teh lul ang ni?
Hla zir han ko ila, mi thenkhat tu tute emaw in, “Zir zir a ngai a mi? Thiam sa pawh in sa seng lo a ni a. Aw tih mawi vel a tul lo, kan theih tawka kan sak mai hian Pathian a ropui zawk!” min lo ti cham chi ve bawk si a!
Heng avanga dawl mai tur chu kan ni hauh lo naa, kan tha erawh min tichak viau lo tih erawh a lang.
Kan tunlai khawvel dinhmun atanga chhut phei hi chuan a harsa ta talh talh thin hle mai a, member dinhmun atanga chhut phei chuan kan chhe telh telh chu a ni ber mai a, kawng dang dap dan kawng zawn a tha telh telh mai.
Tin, kan tui zawng chauh kan tuipui tlur hian hmasawnna min dal fo bawk.

PRODUCTION STAFF
Editor : Lalkhawmawia
Jt. Editor : P.C. Lallawmzuala
David Rualtinkhuma
News Editor : Lallawmkimi
Siamthangpuia
A. Lallawmsanga
Cir. Manager : Vanlalnghaka
Zonunsanga
Zonunkima