SYNFO BUATSAIH PRAISE ON TELEVISION SHOW TAN A NI TA

Kohhran êntu : The 21st August, 2016 (Pathianni) : Synod Information & Publicity Department (Synfo) buatsaih – Rampum huapa Branch KTP aiawha telte inelna PRAISE ON chu District hrang hranga tan a nih hnuah Aizawl District-ah tan a ni ta. Aizawl District hi Mission Veng Kohhran Hall-ah neih a ni.
August 12 zàn atanga tan tawh kha a niin Aizawl District-ah hian August 19, 2016 (Zirtàwpni) khan tan a ni a. Kan Branch atangin Nl. Lalramnghâki d/o Lalêngliana leh Tv. Michael Zotluangpuia c/o Rohlupuii-te an tel.















Kan Branch aiawh hian member 5 tel tura ruat an nih laiin zirna avàngin member 3 hi an tel thei ta lo va, member 2 kan thawh thei ta a ni.
Kan Branch aiawha telte hi Branch chuan an kalna sensote tumsakin an zài ni hian an chhung thenkhatte bâkah Branch KTP hruaitute atangin Tv. R. Lalawmpuia, Tv. Lalchhandama leh Tv. Lalruatkima te’n an va tàwiàwm a. Report kan dawn dànin kan member pahnihte hi anmahni zâwnah an zai tha hlê a, an zai that leh that loh tak tak bâkah endiktute rilru a hneh dàn erawh result-in a la rawn tichiang dawn a ni. Result hi a ni la la-a tihchhuah a ni lo va, endiktute’n hun remchang hmasa berah an la rawn puang ang.
Tàrlan tawh thin angin PRAISE ON hi a vawi khatna a niin Branch KTP aiawha intihsiak pawh hi thil vang tak mai a ni a. Mizorama Reality Show awm tam ber hi chu mimala intihsiak a ni tlangpui a. PRAISE ON erawh hi chu a nihna takah chuan Branch inelna a ni lek lek zawk; mimalah erawh thui tak a innghat thung.
PRAISE ON Audition Round hi Aizawl District-ah chuan ni hnih a awh a. District dangah chuan ni khatah an zo vek thung a.
Audition Round-ah hian hla an duh duh an sa a, Hollow Guitar hman phal a nih angin an hmang tlangpui bawk.
Kan Branch aiawha telte duhsakna sang ber kan hlàn e.

CHANCHIN TAWI
@ August 14 (Sun) hmang khan Bial Kohhran Pavalai Pâwl Meet chu Sáikhamakàwn Kohhran Biak Inah tluang taka hman a ni.

@ Central KTP atanga Letter Head thar hman tur min pêk angin a thar hman tum a ni.

@ Bial KTP êntu man hi pêk a hun tawh avàngin pêk tum a ni a, Branch sum atanga pêk rih nise tih a ni.

@ Kristian Thalai Chanchinbu man hi khawn sa bakah Branch sum atanga pêk tlâk a ni ta.

@ Tunlai hian zan lamah Senior Department te’n Meet an hman turah hla an zir thin a. Tin, zan dang hun awlah an Special Item tur an zir bawk thin.

@ Primary Department te’n tunlai hian tlai lamah Kohhran Hall an Meet an hman turah hla an zir bawk.

@ Intermediate leh Sakramen Department te’n August 21 (Sun) chawhnu hian Centenary Hall-ah hla zir leh tur a ni.
Hetihrual hian, Department dangte pawhin Meet-a mi tur hla zir tur a ni hlawm a, zirtîrtu leh zirlai zawng zawngte kim taka kal turin an inngên.

THUVAWN : Rom 4:4
“Tin, hnathawktu hlawh chu khawngaihnaa ruat
a ni lo va,bata ruat a ni zawk e.”

Thu leh hla

‘Thlarau mi tak tak chu’

– Rev. Dr. Ramêngliana

‘Thlarau mi’ an awm a; ‘ini ti thlarau mi’ an awm leh a; ‘thlarau mi nia kan hriat’ an awm a; ‘thlarau mi tak tak’ an awm bawk a, hriat fuh a har ang reng hlê. A hnuaia mi atang hian enfiah lawk teh ang u –

1. ‘Thlarau mi’ chuan hlimna aiin thianghlimna a dah hmasa thin. Hlimna leh thlarau mi nihna hi inzawm tlatin kan hre fo mai a, a hlim hlim thlarau mi emaw tih a awl. Mahse, thlarau mi dik tak chuan mimal hlimna aiin nun thianghlimna a ngai pawimawh hmasa ber thin. Thlarau chu thlarau mai mai a ni lo va, ‘Thlarau Thianghlim’ a ni si a!

2. ‘Thlarau mi’ chuan ama hlâwkna aiin Pathian ropuina tur a ngai pawimawh hmasa thin. Miin a nawmna leh chanvo tur aia Pathian ram zau zêlna tur a ngaih pawimawh hmasak chuan, “Thlarau mi a ni,” a tih theih ang. Mahni hlim leh lâwmna tur zawnga buai chûk nen chuan a inhlat hlê a ni.

3. ‘Thlarau mi’ chuan nitina Kraws pu nun a nei ngêi ngêi. Chu chu sualna dova hrehawm tuar nun a ni. Thlarau mi leh mi lo chu Kraws kawngah a fiah ber mai – mipui sângnga hrâina hmunah ni lovin.

4. ‘Thlarau mi’ chuan Pathian thlîrna atangin thil engkim a thlîr thin. Pathian Fapa lo lan chhan ber chu Diabola hnathawh tih boral a ni a. Thim leh êngin inzawmna an neih loh avàngin Krista leh Beliara pawhin inzawmna an nei lo. Chu chu Pathianin thil engkim a thlîr dàn a ni. Tisa mi chuan ama taksa nawmna leh hlimna a dah pawimawh hmasa ber thin a. Pathian thlîrna nen chuan danglam tak a ni. Khawvêl thil enjoyment leh Krista rilru hi a inmilna hmuh tur a awm lo a ni.

5. ‘Thlarau mi’ chuan dik lo taka nun aia chuan dik taka thih a thlang thin. Tisa mi inhnemna chu, “Mite pawh eng an ni bik chuang lo,” tih a ni a. I nun nena i teh rûn rûn chhûng chuan i tisual tan tihna a ni ang.

6. ‘Thlarau mi’ chuan amahin hniam phah dâwn mah se, mi dangte sàn zêlna a dâl ngâi lo; mahni inphatin mi dangte tân a thawk hial zâwk a ni. Hei hi thlarau mi zepui pawimawh êm êm a ni. Mahni in-promote nâna mahni chakna hmangte hi ‘thlarau mi’ an ni ngai lo. Mite dâwm kâng a, mite mawina thlentute hi, “Thlarau mi,” an ni thin. Mi dang chàwimàwi hi Thlarau Thianghlim zia a ni si a.

7. ‘Thlarau mi’ chuan lei tehfung hmang lovin, chatuan tehfung a hmang. Lal Isua’n leia ro khâwl lo va, vàna ro khâwl tura a zirtîrna kha a pawm thiam a, a hmaa thil awm rêng rêng chatuan tehnain a teh thin. Tûn hun hlimna mai hi a buaipui ngai lo va, tûn atanga chatuan hi a nun kaihruaitu a ni.

Editorial........

“Kan vêng chu inchàwi-màwi kan thiam lo, insawisêl chiah kan thiam,” tiin kan chênna vêng ngêi chu a nihna nia kan hriatin kan tlangàupui fo thin; dik pawh a dik mai thei.
Zirlai pakhat chuan, “He note hi ka thiam hlei thei dêr lo,” tiin thiam tuma zir lovin, a thiam theih loh thû sawi sawi ta se la, hma a sâwn phah ang em? Sâwn phah lo vang. Mahse, a thiam theih loh thu sawi sawi lo va, thiam tuma a zir chuan, thiam hun a la nei ngêi ngêi ang.
Hetiang chiah hian ‘inchàwimàwi’ kan lo thiam lo a nih pawhin sawi sawi lovin, inchawimawi thiam tumin zir ve mai ila, rei a ni lo vang; kan thiam êm êm ang.
Tunah kan member pahnih rampum huapa inelna PRAISE ON-ah telin an theih ang tâwkin an zirin an va tel ve a. Engnge an mamawh ber ni ang? Tawngtàipuina leh lo lawmpuina a nih a rinawm.
“An va tel ve a, eng ruai an ni lovang,” emaw, “Kan Branch ve chu, engmah kan ni leh chuang lovang,” tia kan lo phun kan lo phun a nih chuan ‘inchàwimàwina kawngah’ hmabâk kan la ngah hlê tihna a ni dawn a. Chutiang ni lo va, theih tâwpa lo tanpui ve dàn kan zawn hi ‘inchàwimàwina’ a ni.

NPSS lâng camp

    Kohhran Hmeichhe hmalâknain August 16 & 17, 2016 chhûng khân Naupang Lâng Camping buatsaih a ni a. Camp-a lût an thahnem hlê nia thu dawn a ni. He Lâng Camp-ah hian Speaker hi Pu Lalêngmawia, Josua Ministry Speaker a niin Director hi Upa Lalhmuchhuaka, Asst. Superintendent (NPSS) a ni.

KOHHRAN ZAIPAWL
August 21, 2016 (Pathianni) zàn inkhâwm bàn hian Kohhran Zaipâwl te’n Music Video siamna tur hlâ zir leh tur a ni a, Kristian Hla Bu ken tur a ni ang. Member a tam thei ang ber hla zir turin kan insâwm a ni.

SYNOD RELIEF FUND
Tûn hnaia harsatna tâwk Chite Vêng, Màmit Hmunsàm leh Lunglei-ahte Lung tha lo, Accident, In chim, Kal leh zunkawnga lungte awm avàngtein Synod Relief Fund atangin chhawmdàwlna Rs.24,000/- chu chhungkaw 4 hnênah hlan a ni.

PRAISE ON RESULT
Aizawl District-a PRAISE ON neih mêk a nih laiin District dangah chuan zawh tawh a ni a, result hetiangin :-
Lunglei Zone – 8 an tling
Màmit Zone – 9 an tling
Kolasib Zone – 25 an tling
Sêrchhîp Zone – 26 an tling
Champhái Zone – 26 an tling

INTER BRANCH BIBLE QUIZ
Saron Vêng Branch KTP-te chuan Inter Branch KTP Bible Quiz an buatsaih dawn a. He hunah hian Branch KTP pawh tel ve tum a ni a, Branch aiawha tel turte Evangelical Cell-in an an la ruat ang.

DIAMOND JIBILEE HMANPUI DAWN
Sàmtláng Branch-in an Branch KTP Diamond Jublee hmanpui tura min sàwm angin telpui nise tih a ni a, lawmpui nan Citation leh Rs. 1,500/- hlan nise tih a ni. Branch aiawhin Tv. R. Lalawmpuia, Pu A. Lallàwmsanga, Tv. P.C. Lallàwmzuala leh Tv. Vànlalnghâka-te kal tura ruat an ni.

SOUND FIX- A DAH
Kohhran Hall-a Sound System awmte hi Fix-a dah tum mêk a ni a. Hmá lo la turin Pu A. Lallàwmsanga, Tv. Lalkhawmawia, Pu Lalrinawma Káwlni leh Tv. Vànlalnghâka-te ruat an ni.

YOUTH RECREATION CENTRE
Ruihhlo ngáite enkawlna leh chhawmdàwlna zêlna te, Camping leh tul dang atana hman atana buatsaih Youth Recreation Centre (YRC) Building sakna tur KTP Member tinin kan thawh tur Rs. 50/- chu khawn mêk zêl a niin khawn zawh tep a ni tawh a. Bial neitute’n mahni Bial-ah kan la khawn bâkte khawn leh zêl tura ngen kan ni.

PROGRAMME

Dt.21.8.2016 : Pathianni Sunday School
Tantu : Pi Lalfakzuali
Zirlai : ‘Khawngaih rawngbawl hnà’
Dt.21.8.2016 : Pathianni chawhnu
Thusawitu : T. Upa N. Zokûnga
Dt.21.8.2016 : Pathianni zàn
Thusawitu : Pu Thanthuama
Dt.24.8.2016 : Nilaini zàn
Tantu : Pi Rohlupuii
Thupui : ‘Sual man chu thihna a ni’
Hawngtu : Tv. R. Lalawmpuia
Dt.27.8.2016 : Inrinni zân
Tantu : Pu Lalramthanga
Hun hman dàn : Rilru sawi

KRISTIAN THALAI PAWL
Dt.22.8.2016 : Thawhtanni zàn
A hmun : Kohhran Hall
Hruaitu : Pu A. Lallàwmsanga,
Secretary
Tantu : Tv. Lalpêkhlûa,
Upa Rokûnga Group
Hun hman dàn : Neih thil/thiam thil thehkhâwm
Lilámtu : Tv. Lalêngkima &
Pu Lalrinawma Kâwlni
Bible reading : Nl. Lalremruati (B-7)
c/o Thanthuama
Zai hruaitu : Tv. Lalruatkima
Musician : Tv. Zârzokima
Tv. Vànlalnghâka
Tv. Zonunkima
Tv. C. Lalruatfela
Thawhlàwm khawntu
: Nl. K. Lalràwngbawli &
Nl. Zoremtluangi

KOHHRAN HMEICHHIA
Dt.23.8.2016 : Thawhlehni zàn
Hruaitu : Pi Lalrinawmi
Tantu : Pi Zohlunsangi
Thuzir : Central atanga zirtûr pêk sa
Thupui : 1. ‘Rilru put hmang dik inzirtîr’
2. ‘Sex chungchang inzirtîrna’
3. ‘Eitur him inzirtîrna’
Zirtîrtu : Pastor C. Sâpkâia
Khuangpu : Pi Lalnuntluangi
Pi Lalhmingliani
Thilpêk lakhâwmtu
: Pi Lalramlàwmi

KOHHRAN PAVALAI PAWL
Dt.18.8.2016 : Ningani zàn
Chairman : Pu Lalthuama
Tantu : Pu Zoramthanga
Thusawitu : Pu Lalhunthara

NEIH THIL /THIAM THIL THEHKHAWM
August 22, 2016 (Thawhtanni) zan hian KTP inkhawmah neih thil / thiam thil thehkhâwm leh lilàm neih tur a ni a, Kohhran Hall-ah neih tur a ni ang. Member-te lilàm tur pe tur leh tlan tura lo inbuatsaih nise. Dár hmasa dár 6:30-ah a ri ang a, dár nawn a awm lovang a, dár 7:00-ah tan mai tur a ni ang.

BIBLE CHHIAR CHHUAH
Branch KTP Diamond Jubilee puala Holy bible chhiar chhuah (Páwn lama hriat theih turin) rûnpui neih tur chu ruahmanna a kal mêk a. October 10, 2016 (Thawhtanni) zàn inkhawm bàn hian hawnna neih a ni ang a, hemi atang hian inchhiarchhâwka chhiar chhuah vek tur a ni a. A chhiar turte hi Secretary te’n an la rawn ruat dawn a ni.
Zan lamah inkhâwm zànin inkhâwm bàn atanga chhiarin zàn dár 10:00 thleng chhiar thin tur a ni ang a, inkhâwm loh zàn chuan chhûn lama chhiarte kha zan lama chhiar tur te’n an chhunzawm thung dáwn a ni. Zîng lamah zîng tawngtâi inkhâwm bàn atanga chhiar tur a ni ang.

SEPTEMBER THLA
Kan ti nek nek a, September thla kan lo chuangkai dawn hnai ta. KTP inkhâwm a awm dawn lo va, Kohhran inkhâwm veka hun hman tur a ni ang.

THLIRNA

Tûnlai chu fur lai a ni a, khua a hnawngin a chang chuan rin loh takin a tha leh em em lawi si a. Tha tura kan rin laiin an lo tla leh vak thin bawk a.
Mi ramte angin kan power line-te hi lei hnuaiah phûm ve a la ni thei rih lo va. A changkang ber pâwl pawh cable-a tuam a la ni rih a, zia chu a ziaawm tawh khawp mai.
Thawktu indaih lohna avàngin vêng tinah power lam duty indah vek theih a ni lo va, kan veng hi kan vannei a, thawktu pahnihin min uap thei a, a làwmawm hlê mai.
Kan khawsakphung hi ‘power supply’-ah thui tak a innghatin hun reilote chhûng a awm loh pawhin kan buai thei thin hlê mai a, changkànna chi khat a ni.
Hmasâwnna tur kan la ngah êm avàng leh kan khâwlte duh anga a la changkàn tâwk loh avàngin power supply off-a hnathawh ngaih hun a la tam thin khawp mai a, dawhthei taka kan lo nghah a ngai thin.
Hetiang hunah hian a theih ang anga mipuite hnêna information pek thin hi a hlu hle-in a hriat. Power supply a awm lo va, a chhan kan inzâwt a, hna an lo thawk dáwn a lo ni a. Inrin lâwkna awm miah lo va nilênga a awm loh thin phei chuan nunphung a khaihlak lek lek a ni ber mai.
Hetiang hun a lo thlen dâwn hian engtin emawa inhrilhlâwk dàn zawn ni ta se, kan nunphung a khaihlak lo deuh ang tih a rinawm.

KTP INKHAWM DAN
August 15, 2016 (Mon) zan KTP inkhawm dan :-
Upa Pêngthangvunga Gr. : 13
Upa Kûtdênga Gr. : 15
Upa Thangkima Gr. : 15
Upa Rokûnga Gr. : 10
Junior Gr. : –
Mi dang : –
Total : 53
Thawhlawm : 1,190
Mi 1 thawh dan : 22.45

PRODUCTION STAFF
Editor : Lalkhawmawia
Jt. Editor : P.C. Lallawmzuala
David Rualtinkhuma

News Editor :
   Lallawmkimi
Siamthangpuia
A. Lallawmsanga

Cir. Manager :
Vanlalnghaka
Zonunsanga
Zonunkima