BRANCH KTP DIAMOND JUBILEE  ZAIPAWL MUSIC VIDEO

Kohhran Entu : The 3rd July, 2016 (Pathianni) : Kum 1956-a din Branch KTP chuan kum 2016-ah Diamond Jubilee lawm a ni a. Hemi pual hian Kohhran Zaipawl Music Video siam tum a ni.
Branch KTP Committee chuan, “Diamond Jubilee (June 10)-a lawm ni mah se, kumin hi kan kum 60-na kum a nih avangin Jubilee hnu lamah Jubilee pual Music Video hi siam nise,” a tih angin ruahmanna siam tan a ni a. ‘Ber’ thla lamah chuan a tak hmuh inbeisei ila.
A vaiin Music Video atan hian Rs. 23,000/- a ruahman a. Heng bakah hian mimal inhuamna (ei leh in, kal velna leh a dangte), beiseina sang tak nei chungin ruahmanna hi a siam ta a ni.
Music Video siam tur hi Kristian hla bu No. 347-na ‘Hrahawmna le buaina piah saw’ tih a ni a. Zaipawl enkawltute’n a hal sak dan tur piahah sound track thleng an la rawn ngaihtuah dawn a. Hla zir hun pawh an kutah a awm ang.
Kumin hi KTP te’n activity kan neih tam kum a ni a. Hemi avang hian hun engemaw ti chen kan chawl chho ang a, Music Video siam dawnah chuan kan vaiin theih tawp kan chhuah a la tul dawn a ni. Tin, Music Video hi siam mai mai theih a ni lo va, tawngtaina nen a tam thei ang ber kan tan a ngai dawn a ni.

BIAL KTP HRUAITU BIAL FAN PROGRAMME BUL TAN CHHO TA

Kohhran Entu : The 3rd July, 2016 (Pathianni) : Bial KTP hruaitute’n kum 2016 atana Bial chhung Branch tin tlawh chhuah programme an ruahman chu kan Branch atanga tanin kumin chhungah a khat tawka programme siamin hmalak tum a ni.
Bial hruaitu Branch tlawh hi tunhma lam chuan bial KTP Conference-ah agenda-a lo luta, pass a nih hnuah Bial KTP Committee-in ruahmanna a siam thin kha a ni a. Amaherawhchu, kum 4/5 vel atang kha chuan Bial KTP Committee thuneihnaa kalpui a ni ta a. Kuminah pawh hian Bial Conference-in a rel ang ni lovin, Bial KTP Committee-in a rel angin Bial hi fan a ni ta a ni.
Programme hmasa berah kan Branch tlawh a ni a. Bial Secretary Pu Robert Lalchhuanliana hnen atangin Pathian thuchah tha tak mai kan ngaithla a, a hnu leh lamah pawh sermon sawi hlawh tak a ni.
Branch tlawh hi thla tin neih a ni ang a, thawhtanni zan vawi thumna zelah hun hman a ni ang. Kum dangah chuan a tawp lam emaw, a lai hawl emaw kan ni thin a, kuminah chuan a bul tanna kan ni ta thung. Hetihrual hian, Bial hruaitute lo kal zan hian inkhawm kan tha lo hle mai a, member-te kawng engkimah kan tan deuh deuh chu a ngai niin a lang.


CHANCHIN TAWI

@ Presbyterian Hindi Bible School, Bawngkawn-ah zir duh tan dil theih a ni. Hre chiang duh tan Synod Office-ah zawhfiah theih reng a ni.

@ Synod Hospital, Durtlang chuan GNM zir tru a la leh dawn a. Dilna form hi July 30, 2016 thleng lei theih a ni. Form leh prospectus man Rs. 200/- ken tur a ni ang. Dilna Form thehluh hun hi July 30, 2016 thleng a ni ang a, Principal Office, Synod Hospital, Durtlang-ah thehluh tur a ni ang. Hre chiang duh tan a chunga form thehluhna turah zawhfiah theih reng a ni.

@ Tun hnaiah Synod Relief Fund atangin harsatna hrang hrang avangin chhawm-dawlna Rs. 12,00/- pek chhuak a ni.

@ July 3, 2016 (Pathianni) hi Health & Hospital Sunday a nih angin Synod Hospital-a thawkte, hmun hrang hrang 13 (Aizawl leh Aizawl pawnah)-ah sawmna an dawn angin thusawina hun hmangin an fehchhuak.

@ Br. KTP Refreshment Sub-Committee atan Tv. Zo -nunsanga, Tv. Vanlalnghaka leh Tv. R. Lalnunkima-te ruat thar an ni.

@ Kohhran Hmeichhia te’n thawhlehni zan inkhawm banah Bethel neih tur a ni a. Hruaitu tur hi Bial 1-na atanga inruat tur a ni ang.

@ Kohhran Pavalai Pawl te’n July 5 (Thawhlehni) zan dar 7:00 hian Kohhran Committee Room-ah July thla Committee neih tur a ni a, kim taka kal turin member tinte ngen an ni.


THUVAWN :
Sam 39:7
“Tin, LALPA, tunah eng nge ka nghah le? Nangmahah a ni, ka beiseina awm chu.”


EDITORIAL

Kan Kohhran (Presbyterian) kalphung hi ‘Upate Rorelna’ tih a ni a. Thuthlung Thara Kohhran hmasate kal hmang zuia ti kan ni a. Fuh pawh a la fuh hle.
Inkhawmpui Rorel hmanga kal kan nih laiin chumi bawhzuina kawngah pawh chuan Committee thu-a kal kan ni a. Mi thenkhatte’n, “Lal Isua pawh lo kal dawn se, ‘Kan han Committee phawt ang e,’ kan ti ang,” tia Kohhran kal hmang seltute an la awm leh thin : kan kohhranah chuan!
Mi pahnih khat thu-a kal kan nih lohna chauh hi kan Committee thinna a ni tih kan hriat thar leh a tha hle. Tin, Kohhran hmasate’n, “Thlarau Thianghlim leh keinin,” an tih ang chiah kha vawiin thlenga kan la zui chu a ni.
Chutihrual chuan, ‘ni tlata inhriatna’ hian min zui thuk ta khawp mai a. Rorelna Maicham khata ngaihtuah theih a nih laia mahni duh thu-a kalpui tumna erawh chuan hmun lo luah ve phet a tum fo thin. Chu chu hnawl ngam a ngai tan ta.
Mitinin, mahni ta chauh en lo va; mi dang ta pawh en tura min zirtirna hi kan Kohhran ze laipui tak a ni a, chumi kan vawn ngheh phawt chuan kan Bible thu-a kal kan ni reng ang.


THU LEH HLA

Rev. Liangkhaia chanchin

Tun tum chu ‘thu leh hla huang’ a nih angin Mizo Kristian zinga mi Pastor nemngheh hmasak ber REV. LIANGKHAIA chanchin hi lo tarlang teh ang. – Editor

Kum 1884 chu Mizo hnam history-ah engtikah mah theihnghilh a ni tawh ngai lo vang : Arsi tlak kum a nih avangin chhinchhiah reng tur a ni a. Liangkhaia pian kum a nih avangin chhinchhiah tlat tur a ni bawk.
‘Liangkhaia’ tih hi a pianpui hming chu a ni bik hauh lo va, a pa hi pasaltha a ni a; a sak hawn ve te chhuangin a fa hmingah Hrangchina a sa a. A pian hnu tuk thum tukah Mizo danin arte hring bana thaawi tur a ni a. An puithiam hman chu pa phawk deuh mai hi a lo ni kher a. Mite tih dan ang lo takin arte chu a nghawngah a hling a, liang hmawrah chuan a khai ta tlat pek a, mite chuan mak an ti hle a! “In tih dan a mak em mai, naute pawh chu a hmingah Liangkhaia tih ngei tur a ni ang, “ an ti a. Hrangchina chu Liangkhaia a lo ni ta.
A pa chu Thanghluta a ni a, a nu chu Hauzachhingi a ni. Liangkhaia chu Saihum-a an awm laia piang a ni. Sentlangah an pem a, 1889 vailen lai khan an khua chu an hal darhsak vek a, khawthar kaiin Thingkhuangah an awm leh a. Kum 3 lek hnuah Lungdaiah an pem leh ta a ni.
Kum 14 mi a nihin a pa-in 1898 khan a tihsan a, a nu leh a farnu pahnih mai an nih avangin an tan khawsak a har dawn si a, a pa unaute’n Ziallungah an hruai ta a ni. Ziallunga an awm la hian ziak leh chhiar a zir tan ve ta a, a tui zawng tak a lo ni a. Lungphekah lungnova ziak tanin pensila mau phel chhung lama ziakin a inzir ve zel a. School a awm lo chungin a taimakna leh a tumruhna avangin 1901 khan khawchhiar thei khawpin a thiam thei a ni.
1904 khan Zawnginah an pem a, kum 5 an awm a. Chutih lai hun chu a lehkha zir nasat ber hun a ni hial awm e. Mahnia inzir a niha vangin beih nasat pawh a ngai viau reng a, chhiarkawp bute pawh chu a tih dan tur kaihhruaina zul zuiin a inzir zel mai a ni. Amah hi lehkhathiam thei tak mai a lo ni a, Zawngina an awmlai phei chuan a thiante pawhin fing an ti hle a, Zawngin khuaa tlangval fing berah an sawi ta hial reng a ni.
Naupang lian lo tak mai a ni a, a kum rualpuite aiin a te fak bik hle thin. A taksa a tet em avangin kum 20 a tlinin thingnawi fawm pawh a awl chauh a ni awm e.
1908 khan Lower Primary Exam turin Aizawl a pan ve ngawt mai a, School pawh kal miah lo. Thingtlang mi lehnghal zirtirtute chuan an lo ring lo hle mai a; mahse, amah a inhre chiang a, mi luhlul, tumruh leh paukhauh deuh mai a ni bawk a, a huphurh lo hle. Exam hma ni 10 vel emaw chu School a kal ve zawk awm e. An han exam mai a, pakhatna a ni der mai! Mite’n mak an ti hle! Hemi tuma exam tura a lo kal hian a thlen in te’n Isua chanchin bu an neih chu a chhiar thin a, ngaiahnawm a tiin mittui tla hial khawpin a rilru a khawih a, chuta tang chuan ringhlel hauh lovin Isua zuitu a ni hlen ta!
An khua a haw chuan an lalin a lo ngaithei lo nasa mai a, Pathian thu an awih avang chuan a thian pa Tumbila nen an la chuan na fe fe-in tum thum a vel a, a khawih na deuh a ni ang; Liangkhaia phei chu a dar vei lam a that loh phah a, a dam chhungin a dik loh hlen phah ta nghe nghe a ni. An lalin, “Ka thah hma che u hian tlanbo vat mai rawh u, khuaa awmah pawh ka duh nek lo va che u,” a tih avangin Mizorama Biak In dinna hmasa ber Zokhawsangah an pem ve ta a ni. Zokhawsangah hian 1907 khan Biak In a ding a ni. Heta an awm lai hian an tangkai hle a, nuam pawh an ti hle a ni.
1909-ah Zosaphluia kutah baptisma a chang a, a hming tak Hrangchina tiin baptisma hi a chang a ni. Chuti chung chuan a thih ni thlengin Liangkhaia a ni ta tho tho.
1910 – 1012 chhung khan Tirhkoh hna a zir a, a zir chhung hian a thiam ber a ni tluan parh a ni. Tirhkoh hna a zsir chhung hian kum tin thla khat chhung Pathian thu sawiin a zin chhuak thin a, Mizoram hi a fang chhuak hman deuh thaw a ni. 1911-ah tam a lo tla a, khawsak a harsa hle mai a, chumi avang chuan a farnute leh an makpate nen an nu hovin Aizawlah an pem a, Mission Vengah an khawsa ta a ni.
1913-ah Zosaphluia’n Pathian thu zir tura a tih tlat avangin Cherra-ah a liam thla ve ta a.  Mizo zir hmasa dangte an lo chhuah tawh si avangin amah maiin hmelhriat loh karah a zuk khawsa ve ta a. A zir tirh lam chuan a buai ve deuh a; mahse, tlema a’n man hnu chuan a phur chho ta viau
va. Kum 1-na tawpa an han exam chuan pahnihna a ni ta hial a ni. Chuta tang chuan a awm chhung zawngin pakhatna a ni ta ngar ngar a ni. Zai lam tui mi tak a lo ni a, Cherra-a a awm lai hian tlai ban hnuah Tonic Solfa a zir thin a, Elementary, Junior leh Intermediate Certificate a dawng hman a, Mizo zinga a hmasa ber a ni. Chu a Solfa thiamna chu hmang tangkaiin Mizo Kristian hla tha tak tak a phuah a, a hla phuahte leh a lehlin 31 lai Kristian hla bu-ah hian a awm nghe nghe a ni.
April 13, 1917-ah Ngurchhuanin nen an innei a, fa pakhat Biakliana an nei hman a. Anupui chuan a thihsan leh ta mai a. 1924 khan a nupui nau Ngurliani chu nupuiah a nei ve leh ta thung a, ani nen hian fa 11 lai an nei a ni.
Pastor atan nemngheh a nih hnu hian hmun hrang hrangah a thawk kual a, 1958 khan a pension a. Mahse, Aizawl Theological College-ah rawih zui a ni a, 1971 thleng khan a thawk a ni.
1978 kum tir lamah a tlu sual palh a, a tap tawm ta reng a, a tha leh tan viau tihin nat lawk pawh awm lovin; tawng lo leh che lovin a lo awm ta thut a! Kar khat lai chutianga awm hnu chuan June 27, 1979 zan dar 8:40-ah a thi ta a ni. A tukah Mission Veng Biak Inah Synod Moderator Rev. Lalruma’n a vui a, Mission Veng thlanmualah an phum ta a ni.
Rawngbawlnaa thahnemngai tak, thusawi thiam zet mai a ni a. Zoram dung leh vang mai bakah Reng ram leh Kawl ram thlengin a fang a ni. A hming pawh a thlang hle. Tum khat pawh Kawl ram a fan tumin pawih pakhatin, “Uai, ‘Liangkhaia’ an tih hi Paula rual lai tur emaw ka ti a, a va la naupang em!” a ti hial a ni!
Thusawi lama hmingthang mai a ni lo va, ziak lam pawh a thiam hle. A danglamna tak chu vawi khat a ziah tawh hi a ziak nawn leh ngai tawh lo a ni. Kohhran tana lehkhabu tangkai tam tak a ziah bakah thuziak dang a ngah hle. Mizo hnam chanchin chhuina lam lehkhabu engemaw zat a ziak a, ‘Mizo Chanchin I & II’ chu a lehkhabu zinga mi hriang hlawh ber a ni hial awm e. Mizo History ziaktu hmasa ber a ni.
Arsi chanchin, ngaihnawm tak, Mizo Pa chhut dan tarlang thei a ziak bawk a. Hetiang chi lehkhabu hi tunlai thlengin kan la neih belh lo a ang hle. A lehkhabu ziak leh lehlin hi 30 vel a tling a ni. Liangkhaia hian a hawl zau hle; Pathian thu, History, Culture, Astronomy, Education, hla lam a khawih kim viau. Mizo thu leh hla lama hmasawnna rahbi pawimawh tak zinga pakhat a ni ngat mai. Hengte avang hian Mizo Academy of Letters chuan a thih hma lawk March 24, 1979 khan Mizo Academy Award a pe a, Certificate leh Tangka Rs. 1,000/- a dawng nghe nghe. Mizo Academy Award dawng hmasa ber a ni.
Academy Award Certificate-ah chuan ti hian a inziak a, “Rev. Liangkhaia hi thu leh hla lama Mizote min kaihruai thintu a ni a, a lehkha ziakte hian kawng tam takah kan hnam min thantir a, Mizo Hristory leh Mizo Arsi chanchin hriat dan a ziakte phei hi chu sulsutu tak meuhvah kan ngai a; chuvangin, Mizo Academy of Letters chuan Rev Liangkhaia hi 1979 Academy Award kan pe a ni.” tiin.
Kohhran hruaina kawngah mi hmantlak tak a ni a, Assembly/Synod Moderator-ah tum li lai a tang nghe nghe a, a thih hnu hian 1979 Synod Bu-ah ti hian a chanchin an ziak nghe nghe, “Khawmpui leh Committee thu a zahthiam a, Kohhran phuntu leh chawmtu; Zoram Kohhran ban zinga pakhat chu a ni ngei mai,” tiin. Kohhran ban bakah Zorate Literature ban zinga pakhat chu a ni ve ngei mai!


CHANVO NEITU TURTE

July thla chhunga Kohhrana chanvo neitu turte :-

Meeting Chairman : Upa Chalhnuna
Khuangpu : Pu Vanlalchhuanga
Pu H. Lallawmsanga
Pionist : Tv. Pachhunga
Thilpek lakhawmtu : Nl. Jessica Lalramnghaki
Nl. Lalhriatpuii
Nl. Zothanpuii
Nl. Hmingthantluangi
“Chhuak hmasaah khan kan tihsual avangin kan han tarlang nawn leh a ni, ngaihdam kan dil e.”
– Editor & Staff


THLA TIN THAWHLAWM

June thla KTP thla tin thawhlawm, Upa Bial tin atanga luh dan hetiangin :-
Bial 1-na Tv. Lalruatkima – ` 1,530/-
Bial 2-na Tv. R. Lalawmpuia – ` 4,675/-
Bial 3-na Nl. Lalengzami – ` 4,430/-
Bial 4-na Nl. Lallawmkimi – ` 1,090/-
Bial 5-na Pu H. Lallawmsanga – ` 1,410/-
Bial 6-na Tv. Lalkhawmawia – ` 850/-
Bial 7-na Pu Lalrinawma Kawlni – ` 2,220/-
Bial 8-na Nl. K. Lalrawngbawli – ` 1,000/-
Bial 9-na Tv. P.C. Lallawmzuala – ` 1,000/-
Bial 10-na Nl. Lalruatfeli – ` 10,10/-
Bial 11-na Tv. Lalchhandama – ` 630/-
                       TOTAL – ` 19,845/-


REDUCTION SALE..!!

July 4 – 9, 2016 chhung hian Synod Bookroom hrang hrangah Reduction Sale neih leh a ni dawn a. Bungrua 5% – 80% inkar discount a ni ang. Zing dar 8:00 – tlai dar 5:00 thleng dawr theih an ni dawn a, hmang tangkai turin mi zawng zawng sawm an ni.


GOSPEL CAMPING

Synod Revival buatsaih Gospel Camping chu July 5 – 10, 2016 chhung hian Synod Revival Camping Centre, Neihbawih-ah neih leh tur a ni a, Speaker atan Pu R. Lallungmuana, Hebron Revival Team a ni ang.Camp lut duhte chu mahni Kohhran Secretary hnenah in report tur a ni. Registration Fee Rs. 100/- ken tel tur a ni ang. Camp-a lut turin a duh apiang sawm an ni.


PROGRAMME

Dt.3.7.2016 : Pathianni Sunday School
Tantu : Pi Lalrempuii (B-7)
Zirlai : ‘Paula’n Thlarau Thianghlim a sawi dan’
Pawl lak dan : Mahni Pawl-a theuh lak tur

Dt.3.7.2016 : Pathianni chawhnu
(Health Sunday)
Thupui : ‘Zunthlum leh thisen sang’
Sawitu : Upa Lallianzama

Dt.3.7.2016 : Pathianni zan
(Hospital Sunday)
Thupui : ‘Damna kim – Isua’
Sawitu : T. Upa N. Zokunga

Dt.6.7.2016 : Nilaini zan
Tantu : Pi Lalnuntluangi
Thupui : ‘Hnam thlante hlawhchhamna’
Hawngtu : Pi Lalsawmi

Dt.9.7.2016 : Inrinni zan
Thusawitu : Pi Lalruaii


KRISTIAN THALAI PAWL

Dt.4.7.2016 : Thawhtanni zan
Hruaitu : Tv. Zarzokima,
Committee Member

Tantu : Tv. Vanlalthazuala,
Upa Kûtdênga Group

Hun hman dan : Br. Finance & Gr. Secy. report
Rilru sawi
Cell thuchah : Tv. Lalrammawia

Bible reading : Nl. Vanlaldiki (B-9)

Zai hruaitu : Pu H. Lallawmsanga
Pionist : Tv. R. Lalnunkima

Thawhlawm khawntu
: Nl. Jessica Lalramnghaki &
Nl. C. Lalhriatpuii


KOHHRAN HMEICHHIA

Dt.5.7.2016 : Thawhlehni zan
Hruaitu : Pi Saihmingthangi
Tantu : Pi Hundangi
Hun hman dan : Rilru sawi
Khuangpu : Pi Saidingluaii
Pi Zothanpari
Thilpek lakhawmtu
: Pi Lalthannguri


KOHHRAN PAVALAI PAWL

Dt.7.7.2016 : Ningani zan
Chairman : Pu Lalrindika (B-4)
Tantu : Pu Lalthuama
Hun hman dan : Sharing


KTP INKHAWM DAN

June 27, 2016 (Mon) zan KTP inkhawm dan :-
Upa Pêngthangvunga Gr. : 10
Upa Kûtdênga Gr. : 18
Upa Thangkima Gr. : 16
Upa Rokûnga Gr. : 13
Junior Gr. : –
Mi dang : –
Total : 57
Thawhlawm : 770
Mi 1 thawh dan : 13.50


THLIRNA

Hmanni chu, “Mahni veng chhung a lawm,” tiin Zophei-a Lalsavunga Park (LAD Park an tih bawk) chu ka han kal ve a. Remchangah la-in, “Thlate pawh la ve ila,” kan ti a, thianho chuan kan inphur chhuak ta a.
An sawi ka lo hriat lawk tawh ang ngeiin tlawhtu an lo tam mai a, duty Tv. P-a ka han zawh chuan, “Vawiin chu an tlem ni tak a nih hi,” a ti a, tam ka lo tih rilruk nen, an tam ni phei chuan a va pui awm mep mep ve le!
Chutah chuan mi chi hrang hrang ka han hmu a, vai hnathawk thlengin. Nawm-chen duh avanga kal te, hun khawhral nana kal te, chhungkua nena kal te chenin kan kim hle.
Bur leh eng ilo fahran pawh a let phung mai a. “A va’n tawp awm em em,” tih mai tura mawi a nih laiin felfai tak taka khawsa engemaw zat ka hmu bawk a.
Mi tam tak te’n kan thil tih a chhe lai kan inhmuhsak viau laiin a tha lai erawh kan inhmuhsak duh lo fo erawh a lo tha lo khawp mai. Kan veng park hi tlawhtu an la pung zel dawn a, mi tha tam tak awm laiin tha lo tak tak thlengin kan la mikhual dawn tih a chiang reng.
Tunah chuan veng tlawhpawh tak kan nih tawh a, park tlawh leh ar insualtir tura lo tleh phei an ni a, tlawhtu ngah chuan changkanna leh tawpna a keng tel tih hriaa tun aia fim zawka kalpui dan awm se.

Naupang pual chhuak leh turah  chuan School leh a kawtzawl lem rawn ziak rawh le! Pencil chauh hman tur a ni ang a, rawnga rawn chei a ngai lo vang. Mahni gaihtuahna hmangin a ziah theih ang a, a lem entawn pawhin a ziah theih ang. A thla lak erawh pawm a ni lo vang. Kan naute lo enpuia a awmzia lo hrihfiahsak nise. Blank Paper-ah rawn ziak se, lawmman pakhatna lemziah hi tarlan a ni thung ang.
Chhuak hmasa lawmman dawngtu - Lalhriatzuali (Kum 10)

PRODUCTION STAFF

Editor : Lalkhawmawia
Jt. Editor : P.C. Lallawmzuala
David Rualtinkhuma
News Editor  :
   Lallawmkimi
Siamthangpuia
A. Lallawmsanga
Cir. Manager :
   Vanlalnghaka
Zonunsanga
   Zonunkima