BIAL MASIHI SANGATI TE'N CAMPAIGN HMANG MEK

Kohhran Entu : The 26th June, 2016 (Pathianni) : Bial Masihi Sangati chuan Bial chhung Kohhran tinah Masihi Sangati chung changah campaign an hmang mek.

Masihi Sangati rawngbawlna tun aia chak zawka kalpui a nih theih nan te, Bial chhung Kohhran tinah Masihi Sangati rawngbawlna ngaihhlut zual a nih theih nante theih tawkin hma an la. Tunah hian Bial chhung Kohhran pangaah Hlimen leh Melthum-ah chiah Masihi Sangati din a ni.

Masihi Sangati hi tun hma lam chuan Non-Mizo Christian Fellowship tih a ni thin a. Khatih hunlai khan Bial chhung Kohhranah ngaihhlut a hlawhin rawngbawlna nung tak neih thin a ni a, tunah hian a hming thlak a nih vang pawh ni lovin, Masihi Sangati rawngbawlna hi thi si lovin a kal hram hram a ni a. Rawngbawlna pawimawh tak a nih rualin ngaihhlut erawh a hlawh tawk lo fo.

Hemi hi hre rengin Bial Masihi Sangati hruaitute chuan Bial chhung Kohhran tinah tha thara hmalak relin campaign hi an nei ta a ni. Campaign neih hun leh hmun bakah thusawitute leh la sawi turte lo tarlang ila :-

June 12 (Sun) : Melthum – Pu Zolianchhunga, Hlimen
June 19 (Sun) : Hlimen Vengthar – Pu H. Zosiama, Melthum
June 26 (Sun) : Hlimen Damveng – Evan. Lalduhawma
July 10 (Sun) : Saikhamakawn – Upa R. Thangmawia
July 17 (Sun) : Hlimen – Upa Lalremsanga
Thusawitute hian Pathianni zan inkhawmah minute 15 zel hun an hmang a, he campaign hian Bial chhungah nasa zawka hna a thawh chhoh zel beisei ila.

CHANCHIN TAWI
@ June 26 (Pathianni) chawhnu inkhawm banah KTP thlatin thawhlawm chhiar a ni ang.

@ June 26 (Pathianni) chawhnu inkhawm bana thlatin thawhlawm chhiar zawhah Branch Committee neih nghal tur a ni a, member-te kim taka kal nise.

@ Upa Thangkima Gr.-te chuan an Group sumtuak nan Jumble Sale neih tumin an rawn khawn khawm mek a, tlawmngaih lo chhuahpui turin an ngen.

@ June 24 (Zirtawpni) chawhnu dar 1:00 khan Bialtu MLA Pu K.S. Thanga chuan Bial rawn fangin PWD EE leh PHE EE te’n an rawn tawiawm.

@ Pu Lalawmpuia w/o Ramtharnghaki (B-4)-a chu Durtlang damdawi inah hun engemaw ti chen enkawl a nih hnuah tha takin a lo chhuak. Tunah an chenna inah enkawl zui mek a ni.

@ Mizoram People Forum (MPF) chuan June 21 (Mon) khan Vanapa Hall-ah an kum 10 tlin lawmna hmangin political party aiawh te, Central YMA leh MUP aiawh te’n thu an sawi bawk. Tin, Election Commission of India atanga palai lo kal te’n thu sawina hun an hmang bawk.

THUVAWN : Sam 37:21
“Mi suaksual chuan a puk a, a pe leh thin lo va; mi fel erawh chuan mi a khawngaih a, a pe zawk thin.”

EDITORIAL
“Kan Kohhran chhung-kuaah hian engang mite hi nge kan mamawh ber?” tiin han inzat ta ila chu, kan chhanna a inang lo hlawm nual mai thei.
Mitin hian ngaihdan leh duh dan kan nei vek mai a, kan ngaihdan leh kan duh dan erawh a lo inrual lo khawp mai.
Tehfung pawh kan neiin, chu kan tehfungah chuan keimahni chu kan han indah tling phawt a, mi dang erawh chu dah tlin a lo har thin khawp mai bawk.
Chhanna hrang hrangah chuan ‘thlarau mi’ a nih a rinawm. Chutah pawh, ‘thlarau mi’ kan tehna chu a lo inang lo leh hlawm viau lo si ang!
Kan Kohhran hian kan mamawh tam tak zingah chuan – ‘Mi tak’ tih ringawt hi a ni awm e. ‘Mi tak’ tih avanga in la tak, kawng kal ding ngar ngar, tawng tam lo, chet dan pawh muang churh lam ni lovin, mahni kova lum hlenchhuak thei tur, mi chhel, mi tumruh, a saseha tlanchhe ngai lo an pawimawh ngeiin a rinawm.
Thil engemaw lo thlenga buai ve ngai lo, a harsat deuh pawha tawlh ngai lo, hmalam pan zel duh mi, khawtlang leh chhungkuaa dikna leh rinawmna vawng mi an ni deuh ber awm e.

THU LEH HLA

kohhran kalphung pela kal
– K. Lalfakawma
Kohhran tin hian kalphung kan nei vek a. Roman Catholic, Baptist, UPC leh a dangte kan awm nual mai a. Heng Kohhran hrang hrangte hian kan Kohhran kalphung pela kal hi kan duh lo vek a. Hei hi keini Presbyterian Kohhran pawh hian kan hriat a pawimawh hle.
Kan Senior Minister chatuan ram pan ta – Rev. Saiaithanga chuan hetiang hian a lo sawi tawh thin, “Presbyterian Kohhran indin dan hi a pumpui thu-ah nghet tak si, a ram leh thil awmzia rem turin emaw, a sawtna zawn vangin emaw, a remziaa kaihfan theih si a ni a. Hei hi kan chhuang hle a ni. Amaherawhchu, eng vang leh eng kawng pawha kan kaihfanna chuan Presbyterian dan tlangpui a nek leh sadai a thiah chu phal theih a ni lo. PHal zel ni sela, mumal a awm lo mai ang,” tiin.
Kohhran rawngbawl hna hi mihring remruat mai ni lovin, Pathian chatuan remruat ngei a ni tih hi kan hriat thar a pawimawh hle. Thenkhat chuan kan Kohhran kalphung hi kan nek sawr pawr pawr chang a awm thin. Presbyterian Kohhran hi hman atanga vawiin thlenga kan duh dan leh kan kalphungah hi chuan Kohhran inkhawm hi kan zah em em thin. Kohhran inkhawm chu a zahawm em avangin inkhawm lo te’n inkhawm bang tawk zawnga kalte hi kan hreh a, kan zak ngawih ngawih thin. Inkhawm tum lo te’n inkhawm tura Biak In lam hawia kal mekte tawk zawnga kalte pawh kan hreh ngawih ngawih thin. Mahse, tunah chuan zahna chang hre lo kan tam ta hle, kan inenfiah a tul tak zet a ni. Heng hi Presbyterian kalphung pela kalna chi khat a ni.
Kohhran inkhawm a awm laia khawi hmunah pawh programme dang lo siam hi kan tih ngai loh leh Presbyterian Kohhranin engtik lai maha kan duh ngai loh thil a ni. Thihna chung changa punkhawmte chu thu dang a ni a, thihna ni si lo va khuang lo tihrik tleng tlengte kha kan tih ngai loh, Kohhran duh loh zawng a ni thin. Veng thenkhatah phei chuan Biak In hnaih deuhvah khawhar in a awm pawhin Kohhran inkhawm lai chuan an thu ngawi thuap mai a, inkhawm ban veleh an zai ve leh mai thin. Thihna lam ni si lo va Kohhran inkhawm laia kan hmuh phak leh hriat phak renga programme dang lo siam hi kan Kohhran kalphung a ni ngai lo va, programme dang kan lo siam thin a nih chuan kan Kohhran kalphung kan nek sawr a, kan kal pel tihna a ni. Chuvang chuan, Kohhranhote kan inenlet fo a tul.
Kohhran thurin nena inrem lo va kal ngat phei chu Kohhran kalphung nek sawrna mai a ni lo va, Kohhran kalphung pela kalna leh thurin kalha kalna a ni a. Heng mite hi chu Kohhranin an chung chang a ngaihtuah uluk bik thin. Presbyterian Kohhrana awm mekte chuan dan bu kan neih leh inkaihhruaina chi hrang hrang kan neihte hi kan hre chiang tur a ni a, zawm ngei pawh kan tum thiin tur a ni.
General Assembly, Synod, Presbytery, Bial Inkhawmpui leh Kohhran Committee Rorel reng rengte pawh an zah tur a ni a, kan zawm ngei tur a ni. Presbyterian Kohhran kalphungah hi chuan kan Upate leh kan Pastor ter’n, “Hetiang hi chu kan kal dan tur a ni ngai lo ve,” tia dam diai maia an han sawi tawh hi chuan ‘zawm ngei ngei tur’ angah kan ngai thin. Tawngkam hraw pui pui leh a mupuia inde vak vak hi kan kal phung a ni ngai lo va, kan senior te’n aw-ki sang lo va, “Heti zawk hian kal ta ila, a va tha ver mawle,” an tih hi chuan kan zah a, zawm ngei kan tum thin. A mupuia min den hun hi nghah kher loh tur. Kohhran hmasate hunlai atangin vawiin thleng hian Kohhran nek ran mai te, Kohhran kalphung pela kal tum talhhote hi chu tifuh an la awm ngai lo va, Mizoram Presbyterian history kan thlir kir ringawt pawhin a la dik zel, a ding chang zawk chu KOHHRAN a ni zel thin.
Engvangin nge Pathianin Kohhran chu a humhalh tlat kan tih chuan, “Ama thisena din ngei a nih avangin Pathianin Kohhran chu a humhlah tlat a, a chhiat a phal ngai lo. Kan Kohhran lungphum chu Krists Isua a ni a; tui leh thisen leh thu-in a siam thar a ni.


CHANVO NEITU TURTE
July thla chhunga Kohhrana chanvo neitu turte :-

Meeting Chairman :Upa Lallianzama
Khuangpu : Pu.H. Lallawmsanga
Pu.Vanlalchhuanga

Pionist : Tv.Pachhunga

Thilpek lakhawmtu :
  Nl. Jessica Lalramnghaki
Nl. Lalhriatpuii
Nl. Zothanpuii
Nl. Hmingthantluangi

YRC PUAL
Youth Recreation Centre (YRC) puala KTP member tinin Rs. 50/- theuh thawh tura tih kha bial neitute mahni bial theuh fang tan tawh ila, kum hmasa lama Branch sum tam tak sen a ngaih tawh loh nan.

GOSPEL CAMPING
June 28 – July 2, 2016 chhung hian Gospel Thunder Team te’n an Camping Centre Zuangtui-ah Gospel Camping an nei dawn a. A duh apiang lut turin an sawm. Speaker hi R. Lalramliana @ Ramtea a ni ang.
Hre chiang duh tan Phone : 9862439988 / 8731058083

SYNFOCITY

RINGTHAR NEIH ZAT

Kumin 2016 May thla thlenga Synod Mission Field hrang hranga ringthar neih tawh zat hetiangin :-
1. Arunachal East Mission Field : 38 2. Arunachal North Mission Field : 75
3. Arunachal West Mission Field : 110 4. Assam Mission Field : 29
5. Barak Area Mission Field : 164 6. Delhi Mission Mission Field : 15
7. Jharkhand Mission Field : 505 8. Karbi Anglong Mission Field : 58
9. Home Mission North Mission Field : 45 10. Home Mission South Mission Field : 154
11. Kolkata Mission Field : 332 12. Lucknow Mission Field : 109
13. Nepal Mission Field : 91 14. Patna Mission Field : 104
15. Siliguri Mission Field : 65 16. Tripura Mission Field : 651
17. Masihi Sangati : 667 TOTAL : 3,212

CAMPUS MINISTRY
June 23 & 23, 2016 hian Windsome English School, Chhinga Vengthlangah zirtirtute pual Refreshers’ Training leh zirlaite pual Retreat neih pui a ni a. June 24, 2016 (Zirtawpni) hian Blue Star Academy, Bawngkawn-eh hun an hmang leh bawk.


PROGRAMME
Dt.26.6.2016 : Pathianni Sunday School
Kristian chhungkaw thusawi tawi
: Pi Lalengzami
Bial Kohhran Hmeichhia Comtt.
Zirlai : ‘Kohhran tiak tir tana Thlarau Thianghlim hlutna’
Khaikhawmtu : Pastor C. Sapkaia

Dt.26.6.2016 : Pathianni chawhnu
Hun hman dan : Pastor Bial fan
(Lalpa Zanriah Sakramen)
Thehtu : Pastor C. Sapkaia

Dt.26.6.2016 : Pathianni zan
Thusawitu : Pi Khawlvuani
Bial Hmeichhe Chairman

Dt.29.6.2016 : Nilaini zan
Tantu : Pi Lallianpuii
Thupui : ‘Hnam thlante mawhphurhna’
Hawngtu : Pu Biakropuia

Dt.2.7.2016 : Inrinni zan
Tantu : Pu Lalchansanga
Hun hman dan : Rilru sawi

KRISTIAN THALAI PAWL
Dt.27.6.2016 : Thawhtanni zan
Hruaitu : Tv. Lalremruata Chawngthu,
Committee Member
Tantu : Tv. Laltlanhlua,
Upa Thangkima Group
Thusawitu : Pu H. Lallawmsanga,
Committee Member
Bible reading : Pu C. Zomuanpuia (B-10)
Zai hruaitu : Tv. Siamthangpuia
Musicians : Tv. Zarzokima
Tv. C. Lalruatfela
Tv. Vanlalnghaka &
Tv. Lalawmpuia Hauzel
Hla hriltu : Nl. Lallawmkimi (B-2)
Thawhlawm khawntu
: Nl. Lalbiaktluangi &
Nl. Lalngaihawmi

KOHHRAN HMEICHHIA
Dt.28.6.2016 : Thawhlehni zan
Hruaitu : Pi Nunthari
Tantu : Pi Lalnithangi
Thusawitu : Pi Zonunkimi

KOHHRAN PAVALAI PAWL
Dt.30.6.2016 : Ningani zan
Chairman : Pu Lalthianghlima
Tantu : Pu Lianhmingthanga
Thusawitu : Tv. Lalremliana

KTP INKHAWM DAN
June 20, 2016 (Mon) zan KTP inkhawm dan :-
Upa Pêngthangvunga Gr. : 16
Upa Kûtdênga Gr. : 17
Upa Thangkima Gr. : 21
Upa Rokûnga Gr. : 16
Junior Gr. : –
Mi dang : 27
Total : 97
Thawhlawm : 1,340
Mi 1 thawh dan : 14.32

THLIRNA
Ka tih dan thin angin ka phone chu la-in facebook tukverha dah tumin ka han lut a, rin aiin net a chak tha phian mai.
A awm khat nen inbox pakhat lo awmin ‘tu tak ni ang maw?’ tia ngaihtuah leh kawng leh lamah chuan ‘amah kha a ni thei mai ang em?’ tia ngaigtuah chungin ka han hawng a, ka rei..!!
“Ka zak lutuk, ka hlau, ka khur, engtin nge ka tih dawn, ka nu a . . . nih chu..! Engtin nge ka nu a nulat theih?’ tih zawhna a lo awm tuarh mai!
Sawi tur ka va han van tak em! Sualna avanga lo thleng a ni tih hre mah ila, a nu kha sual em ema ka dah chuan a rilru a nat ka hlau si! A pawi lo han tih chi a ni bawk si lo!
A message ka en tawh a ni tih hriain zawhna dang min zawt char char bawk si a!
Chhan loh theih loh a nih hnuah buh nuaihin, “Hetiang hi thil thleng fo tawh thin a ni a,” ka han ti phawt a, “Mahse, enga ti nge ka nu-ah kher kher?” tih zawhna a lo thleng leh nghal. A dang zawng chu dah tha rih phawt mai ang.
Kan rama social network lo chuangchhuak hian kan mimal leh chhungkua min va deng nasa tak em! Kan la ngaihtuah ngai lo leh ni tura kan inrin loh thlengin min deng chu a ni ta si a!
Sual chu kawngka bulah a bawk reng a ni tih hre chung siin kan finkhur duh si lo..!!

PRODUCTION STAFF
Editor : Lalkhawmawia
Jt. Editor : P.C. Lallawmzuala
David Rualtinkhuma
News Editor :
   Lallawmkimi
Siamthangpuia
A. Lallawmsanga
Cir. Manager :
   Vanlalnghaka
Zonunsanga
Zonunkima