BRANCH KTP COMMITTEE THUREL THENKHAT

Kohhran Entu :The 19th June, 2016 (Pathianni) : June 16, 2016 (Ningani) zan khan Branch KTP thla thar Committee neih a ni a, chuta thurel thenkhat hetiangin :-

1. August, 2016 KTP inkhawm hun remchangah Finance Campaign neih tum a ni a, thusawi turin Pastor C. Sapkaia, Bialtu Pastor ruat a ni.
2. Bial KTP Secretary hnen atangin October 8, 2016 (Inrinni) khian Bial KTP huapin kan Kohhran Hall-ah Central KTP Blood Donation Calendar zuiin Blood Donation Camp neih a nih tur thu dawn a ni.
3. Branch KTP Diamond Jubilee puala Holy Bible chhiar chhuah (Pawn lama hriat theih turin) neih tum chu Secretary te’n School chawlh hun an lo zir chiang ang a, OB te’n ruahmanna an la rawn siam ang.
4. Diamond Jubilee lawmna lamah sum tam tak hman a nih avangin Branch sum indaih lohna a lian hle a. Hemi avang hian Group tinah Special Budget Rs. 5,000/- theuh tuk leh a ni a. Hei hi kumin chhunga pek tlak tura ruahman a ni.
5. Diamond Jubilee lawmna atana pawisa dawn atanga Guitar Stand leina tur dawn chu a rang lama lei nise tih a ni.
6. Branch sumtuak nan Mission Veng Bazar phiata inhlawh dil leh tum a ni a, OB te’n lo bawhzui se tih a ni.
7. Group leh Sub-Committee kum chanve sum audit nise tih chu a hun atan July 2, 2016 (Inrinni) zan inkhawm ban ruat a ni a, a hmunah Kohhran Hall a ni ang. Auditor turin Branch sum vawngtute ruat an ni. (Thubelh – He hunah hian sum vawngtute leh a theih chuan Group Leader leh Sub-Committee Chairman-te tel theih nise.)
8. Branch Hollow Guitar Pick–Up chu a that loh thu dawn a ni a. Siamtir nise, Music Sub-Committee te’n lo bawhzui se tih a ni.
9. Branch Diamond Jubilee kan lawm zawh tak chu thlirletna hun hman a ni a. A lawmawmin hlawhtling hle-in kan inhria a; hetihrualhian, kawng tinrengah hmasawnna kan nei niin kan inhria.

YMA DAY LAWM

Kohhran Entu : The 19th June, 2016 (Pathianni) : June 15, 2016 (Nilaini) YMA Day chu Branch YMA pawhin ropui takin a lawm.
Kumin YMA Day hi a hma lam atangin Volleyball hmanga inelna buatsaihin YMA Day (June 15) chhunah final khelh a ni a, Damvea Section te’n mipa leh hmeichhiaah lawmman pakhatna an la.
June 15 zan lam programme chu Costume Nite-a hmangin YMA Hall-a leng lo khawp thalai fuankhawmin kal khawmte a thei theiin mizo incheinaa incheiin Section tin atangin International Costume Show neiin hnam hrang hrang zingah duh thlangin mipa leh hmeichhia inkawp zelin an rawn inchei a. Hemiah hian mizo leh mayan costume-a rawn inchei Buala Section te’n lawmman pakhatna an la. Tin, hemi zan hian Hlimkhawpui Budget pe tha Kapdaia Section hnenah lawmman pek an ni bawk.

CHANCHIN TAWI
@ Diamond Jubilee pual Music Video buatsaih tum chu Zaipawl enkawltute’n ruahmanna siamin hma an la mek.

@ Kumin Aizawl Chhim Presbytery, Hmunthar Kohhran Biak Ina neih turah Pathianni zan inkhawmah kan Kohhran Zaipawl chu zaia rawngbawlna nei tura ruat kan ni.

@ Kohhran Entu man tlawmngaia khawntute leh tlawmngaia latute’n a man lam hi ngaihsak deuh deuh turin kan inngen a ni.

@ June 19 (Pathianni) hi Rualbanlote Pathianni a nih angin zan lama hemi lam thupui ngaihthlak a ni ang a, rualbanlote pual thawhlawm a awm bawk ang.

@ Branch Diamond Jubilee lawmna atan Pu Rozuala-te chhungkua chuan Rs. 1,000/- min hlan a, an chungah lawmthu kan sawi rualin chhuak hmasa lamah report a lo tel loh palh avangin kan tarlang thei lo ve, ngaihdam kan dil tak meuh meuh a ni.

@ Kohhran Entu chhuak hmasa kha kan hertirna Press lamah Power Supply an neih that loh avangin a sem hunah kan sem hman lo va, ngaihdam kan dil tak meuh meuh a ni.

THUVAWN : Sam 37:4
“Lalpa chungah chuan lawm bawk rawh, tichuan, i thinlung duhzawngte chu a pe ang che.”

EDITORIAL
“Hringnun hi hruizen ang a ni a, hruizen pawh a inherh avangin a hrui hi a inlanchhawk thin a. Hetiang chiah hian hringnun pawh thim leh eng inkawp siin an inlanchhawk thin a ni.
Hetiang chiah hian pawlho leh chhungkua, Kohhran thlengin a ni. Hun harsa leh khirh tak tak tawh lai a awm a, hlimni leh lawmni pawh a lo thleng fo thin.
Naupang hlim taka kan chhaih a, an nuih awr awr chuan, “An tah a hnai kan ti thin.” Hetiang chiah hian hlimni leh lawmni kan tawh hnu lawkah hian lungngaih ni leh tah ni a lo thleng fo thin.
Chumi hrethiama lawm taka dawngsawng theite chu ‘mi puitling’ kan tihte an ni thin.
Chumi dawngsawng thiam lote chuan hringnun hi ‘lungngaih ni’-ah an ngai thin.
Kumin hian kawng hrang hranga lawmna leh hlimna, hunpui pawimawh tak tak kan hmachhawn kumin harsatna tam tak kan tawk thung thin a. Chumi avanga kan insawisel aiin engtia hmachhawn tur nge, engtin nge hma kan lak chhoh zawk ang tia ngaihtuahna fel tak kan hman thiam a tul hle. Hun harsa a thleng reng lo vang, chumi hun chu chhel taka nghak mi kan nih a tul hle.

THU LEH HLA

 RUALBANLO TE PUAL PATHIANNI THUCHAH

Mi thiamte chhut dan chuan khawvel mihring za zela panga hi rualbanlo an ni a, rualban lohna hi rilru lam chauh te, taksa leh pianphung chauhva rualban lohna te, rilru leh pianphunga rualban lohnate a awm thei a ni. Rualban lohna chhan hrang hrang a awm a : Nu-in nau a pai lai atanga fel lo awm thei atang te, piantirh lai thil awmdan leh naupan lai natna vei atang te, ei tha tlakchhamna avangte leh mizovin kan sawi thin angin, “Pian sualin tlai luat a nei lo,” an tih angin accident chi hrang hrang avangin rualban lohna a awm thei a ni.

Mizote’n rualbanlote kan hmuh dan leh kan ngaihdan hi a tha vak lo va, kan inzirtir a tul hle. Hnam changkang apiangin rualbanlote enkawl an thiam a, rualbanlote hi rilru lama ban lo an nih chuan finna zirtir theih an ni a, mi pangngai angin an zir chak lo a nih pawhin anmahni rau rauvah hma an sawn thei a, an thiamna zir theih ang ang kha anmahni inenkawl nan leh thil tangkai thawhchhuh ve nan an hmang thei a ni. Mizote hian mi ang mang lote kan bawl khaw lo fo va, mi pangngaia chhuah theihte pawh chhungkua leh khawtlangin kan en dan leh kan enkawl dan avangin mi ang lovah kan chhuah fo niin a lang.

Mi pangngai chen zan lote pawh enkawl thiam chuan mi pangngai ang maia chhuah theih leh mi an chen lohna laite pawh sawi tham loh leh pawi tham lovin a chhuah theih a, chu chu anmahni tan leh chhungkaw tan, hnam pumpui tan a tha em em a ni tih hria ila.

Pianphunga rualbanlo pawh a tul ang zela zirtir leh hmanrua nena thuamin an ruabanlohna lang lo hialin tanpui theih an ni. Khawvelah hian rualbanlo ni si mi ropui tak tak an lo chhuak fo tawh a; mitdel, zaithiam leh hla phuah thiam, vawiinni thlenga hla ropui ber ber phuahtu te; mitdel, khawvel khawmualpui zawng zawnga tlangsang berte lawn chhuak vek thei khawpa chak te, bengngawng, scientist ropui tak te, fu-ke kim lo, mi pangngaiin an tih theih loh thil ti tam tak swi tur an awm a ni.

Lal Isua khan khawvela rawng a bawl lai khan rualbanlote a khawngaihin a tidam thin a. Matthaia 10:27; 9:32-34; 15:29-31-te, Marka 7:31-35-te kan en chuan Lal Isua’n mitdel, kebai, piangsual tinreng te, zeng te, ramhuai man (rilru buai) a tihdam thute kan hmu a ni. Keini pawhin kan zinga awm rualbanlote hi kan enkawl that a pawimawh a, kan Lapa thupek pawh a ni tih i hre thar leh ang u.

Khawvel ram changkhangte chuan rualbanlote tan inzirna te, school hranpa leh infiamna, anmahni pual bikte siamin zin veivahnaah pawh a thlawna chuan theihna te, an tana remchanna chi hrang hrang an siamsak thin a. Kan ram pawhin hetiang lamah hian hma kan sawn ve hret hret a, chak zawka hma kan lak pawh a tul hle a ni.

SUM HMAN DAN

Diamond Jubilee kan hman zawh takah hetiang hi kan sum hman dan a ni :-
Refreshment : 72,690
Souvenir : 17,360
Decoration : 12,530
Zaithiamte lawmman : 11,500
Hruaitu hlui chawimawi : 5,330
Monument : 4,130
Cable TV lawmman : 4,000
Mi bik chawimawina : 3,500
Sound : 3,209
Sanitation : 1,700
CKTP hruaitute senso : 1,000
Resource Person : 1,000
Hnatlang senso : 970
Stationery : 400
TOTAL : 1,39,319

PATHIAN RAM LUH DAN
June thla Pathian Ram thilpek luh dan, May thlaa luh dan leh kan phak loh dan hetiangin :-
Pathian ram : 1,20,020 May : 1,28,490 (– 8,470)
Ramthar : 79,140 May : 83,625 (– 4485 )
Buhtham : 34,875 May : 47,535 (– 12,660)
Tualchhung : 80,690 May : 86,489 (– 5,799)
Biak In thar : 1,87,220 May : 1,92,670 (– 5,450)
Total : 5,01,945 May : 5,38,802 (– 36,857)
Thla hmasa nena khaikhin chuan hma kan sawn lo tih a langin tan kan lak lehzual a ngai a ni.

BIAL KTP HRUAITUTE'N TLAWH DAWN

June 20, 2016 (Thawhtanni) zan hian Bial KTP hruaitute’n kan Branch min rawn tlawh dawn a. Bial Secretary hnen atangin thuchah ngaihthlak a ni ang a, inkhawm banah inkhawm zawng zawngte tan thingpui in tur a awm bawk ang. A tam thei ang ber inkhawm tum ila.

PROGRAMME

Dt.19.6.2016 : Sunday School
Tantu : Pu Laldailova
Thupui : ‘Thlarau Thianghlim hnathawh kal zel’
Pawl lak dan : Mahni Pawlah theuh lak tur

Dt.19.6.2016 : Pathianni chawhnu
Thusawitu : Pu Lalnghakliana

Dt.19.6.2016 : Pathianni zan
Thupui : ‘Isua – Rualbanlote hmangaihtu’
Thusawitu : Upa C. Zothanliana

Dt.22.6.2016 : Nilaini zan
Tantu : Nl Lalengzami
Thupui : ‘Sinai Thuthlung’
Hawngtu : Pu Laltluanga

Dt.25.6.2016 : Inrinni zan
Thusawitu : Pastor C. Sapkaia

KRISTIAN THALAI PAWL

Dt.20.6.2016 : Thawhtanni zan
Hruaitu : Pu Lalrinawma Kawlni,
Committee Member
Tantu : Tv. Hosan Malsawmtluanga
Upa Rokunga Group
Hun hman dan : Bial hruaitute min rawn tlawh zan
Thusawitu : Pu Robert Lalchhuanliana,
Secretray, Bial KTP
Bible Reading : Tv Lalrampara
Solo : Pu Laltleipuia
Zai hruaitu : Tv. Siamthangpuia
Musicians : Tv.Zarzokima
Tv. C. Lalruatfela
Tv. Vanlalnghaka
Tv. Lalawmpuia Hauzel
Thilpek lakhawmtu
: Nl. Zorinsangi
Nl. Lalchhantluangi

KOHHRAN HMEICHHIA

Dt.21.6.2016 : Thawhlehni zan
A hmun : Kohhran Hall
Hruaitu : Pi Zothanpari
Tantu : Pi Lalthannguri
Hun hman dan : Bible Quiz
Quiz Master : Pi Lalrinawmi

KOHHRAN PAVALAI PAWL
Dt.23.6.2016 : Ningani zan
Hruaitu : Pu Ramsanga
Tantu : Pu Robert Lalrindika
Hun hman dan : Sharing

PRODUCTION STAFF

Editor : Lalkhawmawia

Jt. Editor : 

   P.C. Lallawmzuala

David Rualtinkhuma

News Editor : 

   Lallawmkimi

Siamthangpuia

A. Lallawmsanga

Cir. Manager : 

  Vanlalnghaka

Zonunsanga

Zonunkima