HLIMEN PASTOR BIAL KOHHRAN PAVALAI PAWL MEET VAWI 3- NA

Kohhran Entu : The 17th July, 2016 (Pathianni) : Hlimen Pastor Bial Kohhran Pavalai Pawl Meet Vawi 3-na chu August 13 – 14, 2016 chhung hian Saikhamakawn Kohhran Biak Inah neih a ni dawn a. Thupui hi ‘Tho la, i Pathian ko rawh’ (Jona 1:6) a ni ang a, Speaker tur hi T. Upa C. Zairemmawia, Sihphir a ni ang. Programme hetiangin :-

August 13, 2016 (Inrinni)
7:00 PM : Pathian biak inkhawm
Chairman : Pu Laltluanga, Treasurer, BKPP
Tantu : Pu Lalthanliana Ngente, Saikhamakawn Kohhran
Thupui I : ‘Tho la, i Pathian ko rawh’
Speaker : T. Upa C. Zairemmawia
Zaipawl : Combine Choir (Hlimen & Hlimen Vengthar KPP)
Hlimen Damveng KPP

August 14, 2016 (Pathianni)
10:00 AM : Pathian biak inkhawm
Chairman : Pu K. Vanlalsanga, Vice Chairman, BKPP
Tantu : Pu C. Lalremlala, Melthum Kohhran
Thupui II : ‘Tho la, i Pathian ko rawh’
Speaker : T. Upa C. Zairemmawia
Zaipawl : Saikhamakawn KPP
Melthum KPP

1:30 PM : Pathian biak inkhawm
Chairman : Pu Lalthantluanga, Fin. Secy., BKPP
Tantu : Pu Lalramlawma, Hlimen Damveng KPP
Thupui III : ‘Tho la, i Pathian ko rawh’
Speaker : T. Upa C. Zairemmawia
Zaipawl : Hlimen Pastor Bial Zaipawl
Solo : Nl. Lalduhsaki, Durtlang
Nl. Baby Malsawmtluangi, Chawnpui
Trio : Ruthi, Zoremi & Tetea
Chawhnu inkhawm ban zaikhawm
A hmun : Sunday School Hall, Saikhamakawn Kohhran
Hruaitu : Pu Thanthuama, Comtt. Member, BKPP

7:00 PM : Pathian biak inkhawm
Hruaitu : Pu T. Lalrinthanga, Chairman, BKPP
Thupui IV : ‘Tho la, i Pathian ko rawh’
Speaker : T. Upa C. Zairemmawia
Solo : Nl. Lalduhsaki, Durtlang
Nl. Baby Malsawmtluangi, Chawnpui
Trio : Ruthi, Zoremi & Tetea
Zaipawl : Saikhamakawn Kohhran Zaipawl

CHANCHIN TAWI

@ Kan Kohhran Pavalai Pawl-te chuan Tv. Biakropuia, Kapdaia Section dam lo kan nan Rs. 2,670/- an hlan.

@ Aizawl Chhim Presby-tery Kohhran Pavalai Pawl Meet chu Mission Veng Kohhran Biak Inah August 6 & 7 hmang khian hman a ni dawn. Kan Kohhran Pavalai Pawl-te pawhin fakna hla an sa ang.

@ Aizawl Chhim Presby-tery Kohhran Pavalai Pawl Meet-ah Hlimen Vengthar Kohhran Pavalai Pawl-te chu an tam loh avangin kan Kohhran Pavalai Pawl hmingin an tel ve ang.

@ Upa Thangkima Group-te chuan an Group sumtuak nan Jumble Sale an nei a, thilpek petute leh hnatlanga chhuak zawng zawngte chungah lawmthu an sawi.

@ Upa Thangkima Group-te chuan July 19 (Tue) zan hian Group pual Bethel neih an tum.

@ Upa Rokunga Group-te chuan July 25 (Mon) tlai dar 6:00-a tan turin Group pualin chawanghei tawngtai neih an tum. Hemi zan hian tawngtaina hman zawhah KTP inkhawma tel nghal tura inbuatsaih turin member-te an ngen.


THUVAWN : Gen. 4:7
“Thil i tih that chuan lawm i hlawh dawn lo vem ni? I tih that loh erawh chuan sual chu kawngka bulah a bawk reng a ni.”


EDITORIAL
Eng ang pawhin a sak theih na chungin kan Kohhran Pathian biak inkhawma kan zai dan hi chu tleme her rem a tul ta niin a lang.
Lengkhawm hla (Khuang hnih) a nih chuan sak dan phung pangngai a awm a, chu chu a soprano (a Air)-a sak hi a ni mai a, solfa hla (Khuang khat) a nih chuan nula lamte hi lo soprano vek lovin, a contralto (alto) kan thiam chuan sak a tha thin khawp mai.
Mipa thenkhat pawh hi a air-in kan sa thup thup mai a, fakna a nih miau avangin a tha vek mai. Amaherawhchu, mipa hi lo bass ham hamin, a then te’n lo tenor bawk ila, fakna hla (a bikin solfa) hi mawi leh ropui takin kan sa theiin a rinawm.
A part mawina hi a ropui berna ni lo mah se, heng zawng zawnga ropui ber tur chu Lal Isua a ni tih chu hre tho mah ila, part mawi taka pek hian Lal Isua ropuina a nep chuang lo tih leh zai a mawiin sak a nuam em em mai a, Kohhran Zaipawl pawh hian hma kan sawm phah ngeiin a rinawm.
Mipa aw lian mang khenga sak vak vak phei hi chu Opera-te a nih ngawt loh chuan a mawi lo leh lek fo. Part pe-in han ti thum ham ham ila, solfa lamah hma kan sawn ngei ang.


THU LEH HLA
PAWN LAMAH VE THUNG..!!
(Genesis 4:7a)
“Thil i tih that chuan lawm i hlawh dawn lo vem ni? I tih that loh erawh chuan sual chu kawngka bulah a bawk reng a ni.”

Ka tih dan thing pangngai angin ka phone chu lekin facebook lam chu ka han hawi leh a. Rin aia net a chak phian avangin ka lut nghal zat thei. Vanneihthlak takin inbox pakhat a lo awm a; lawm si, phur tak siin, ‘Tu tak ni ang maw? Amah kha a ni thei ang em (Amah chu tunge ka hre chuang lo!)’ tia ka han en nak chuan, “Ka hlau..ka khur..ka tlanchhuak..engmah ka ngaihtuah thei lo..tinge..tinge..” tih message lo awm chuan min tiphu chiang hle mai! Chhan ngaihna reng ka hre lo! A message ka en a ni tih hriain zawhna ngai bawk chu mi zawt leh ta tlut tlut mai a! A chhan ka han zawt chiang ta..chutiang hunah chuan tupawhin khawngaihna leh lainatna thinlung an nei nghal vek ang..!
Kan ram Kristian lo luh hnu lawkah Kristian tam tak kan lo pun phahna ‘harhna’ chi hrang hrangin kan ram min tuam thin a, Pathian malsawmna a thlawna kan dawn liau liau a ni. Tun hnai lawkah pawh Kelkang harhna chuan Mizoram chhung leh ram pawn lam thleng pawhin min tuam a, a kal lo nih phei chu ‘nuam lo’ tak a ni lek lek zawk..!
Chutianga Thlarau Thianghlimin a awmpui mai tawk lo va, a chena a chenchilh nun leh ram neitute zingah hian sualna hian tinge thuk taka bu a khuar theih le? Mi dangte’n an dawn ve ang Chanchintha dawngtu ni ve tho siin, tinge kei ve hi? Hei leh chen hi ti ve tawh nia ka inhriat laiin tinge kal ngaihna reng hre lo va ka hawi ka hawi bik le, tinge mi rin lah ka hlawh theih bik miah loh le, tinge kan tluk reng bik mai le?
Chhanna tam tak a awm thei ang. Kan Kristianna leh kan thlarau mi-na hian Biak In pawn lam a thleng pha lo fo thin a, chu chuan mi dangte kangkai tur min hmehmihsak a, keimahni nun nen lam thi reng siin, nung hmingpu-in kan lo awm thei tlat nia!
Huho nuna thlarau mi viau, mal tlat huna lo danglam leh thin, Biak In leh lamtual lamah chuan a aia ‘thlarau mi’ awm thei chuang lo khawpa mawia kan awm laiin chu’ng chu kan pelh hunah kan nun dan thin pangngai bawka nung lehin tumah leh engmah pawisak kan lo nei leh tawh thin lo fo thin. Engtin nge kan than tehlul ang ni?
Heti zawng hian thlir chhin teh ang : Biak Ina kan kal hian, eitur zawngin lut ta ila; kan puar ta maw tihah pawn lama kan Kristianna lantir turin inkhawm hi bang ta thin bawk ila, tun aiin kan ram leh chhungkua, mimal nun pawh hi a danglam fo lo maw? Pa pakhat chuan, “Ka sawrkar hna thawh hi Pathian hna ka thawhna chi khat a ni e,”  a ti. Pawmsak lo kan awm mai thei. A awmzia takah chuan – Dik tak leh rinawm taka hna a thawh thin vang a ni. Mi tam tak chu kan Kristianna hian kan nitin nun dan hmasa a tidanglam thei lo fo thin. Hei hi chu Kristianna zia tur niin a lang lo.
Mawlte tein, kan thlarau mi-na chu gas lakna hmunah te; tui semna hmunah te (tunah chuan sem a tam ta vak lo zawk a); BPL leh AAY nih loh ngamna te; thil, a nihna baka hlep leh hralh kawngah te; hunbi neia hnathawk kan nih chuan tan hun leh ban hun ngaih pawimawhna kawngahte leh a dang tam takah lantir thin tlang ta ila, kan nun hi sawi danglamin a awm ngei ang a, kan Kristianna pawh hian hma a sawn ngei lo maw?
“A pawi lo,” kan tih hi a lo pawi tawk lek zawk fo thin (thil zawng zawngah ni lovin). Kan mimal nun theuhvah hian ‘A laiah Isua’ awm se, Biak Inah chauh ni lo, pawn lamah zawk thlarau mi na chang hre thar ta zawk ila, vawiina harsatna leh buaina tam tak hi kan tan ‘harsatna leh buaina’ a ni lo thei tlat a ni! Isua avangin.


PATHIAN RAM LUHDAN
July thla Kohhran Pathian ram luh dan hetiangin :-
Pathian ram : ` 1,19,070
Ramthar : ` 79,515
Buhfaitham : ` 37,185
Tualchhung : ` 84,300
Biak In thar : ` 1,70,115
Total : ` 4,90,185


BRANCH KTP COMMITTEE
July 21, 2016 (Ningani) zan dar 7:00 hian Kohhran Committee Room-ah Branch KTP thla thar Committee neih tur a ni a, kohna sem a ni dawn tho va hmu lo palh kan awm a nih chuan hei hi kohnaa ngaih tur a ni ang. Lehkha thehluh tur nei chuan a hma lamin Secretary hnena thlen nise.


ULUK ZAWKIN 
Kohhran Hall-ah hian Sound System changtlung zawka dah belh zel a niin Musical Instrument pawh a hma aiin kan nei changtlung zawk a, hei hi tun aia dimdawi zawka kan enkawl a tul hle. A hmangtute pawhin kan hman zawhah fel taka dah leh turin kan inngen nawn leh a ni.


BRANCH TLAWH DAWN
Bial KTP hruaitute chuan a thawh hnih nan July 18, 2016 (Thawhtanni) zan hian Melthum Branch an tlawh dawn a, Bial Zaipawl te’n zaia rawngbawlna an nei ang. Bial KTP hruaitute Nl. Mimi Zohmingmawii, Asst. Secretary hnen atangin Pathian thuchah ngaihthlak a ni ang. Bial Committee-te kim taka kal turin an inngen.


CHANCHINBU MAN
Kohhran Entu man tlawmngaia khawntute khan kan khawn hmabak khawnin kan khawn tawhte Cir. Manager Tv. Zonunsanga hnenah thehluh nise. Tin, tlawmngaia min lo laksaktute pawhin a man hi min lo ngaihtuahpui hram hram turin kan ngen a che u.


LA FEL TAWK LO
KTP Computer chu CPU lamah fel lohna a la neih avangin duh angin a hman tlak tawk lo va, Kohhran Entu Editorial Board te’n an lo enfel leh dawn a, remchang hmasa berah siamin hman tlak a nih leh ngei kan beisei.


GUITAR STAND
KTP Diamond Jubilee min lawmpui nana Guitar Sand man tur min pek atangin Guitar STand hi chah mek a ni a, NET lamah harsatna kan tawh avangin lo thleng tura rinah a lo thleng hman lo va, tunah hian buaipui leh mek a ni.


YOUTH RECREATION CENTRE
KTP Youth Recreation Centre (YRC) pualin KTP Member tinah Rs. 50/- zel rawn khawn a ni leh dawn a, Bial insiam a niin bial neitute pawhin kan Bial theuh fang tan ila. Nikum lamah Branch sum tam tak hmanga hnawhkhah a nih avangin kuminah chuan hei hi awm tawh lo heam tura Bial tina tan lak nise.


PROGRAMME
Dt.17.7.2016 : Pathianni Sunday School
Tantu : Pi Lalzikpuii
Zirlai : ‘Thlarau Thianghlim leh Baptisma’
Pawl lak dan : Mahni Pawl-a theuh lak tur

Dt.17.7.2016 : Pathianni chawhnu
Thusawitu : Upa Vanlalzuia

Dt.17.7.2016 : Pathianni zan
Thusawitu : Upa Rinngaia

Dt.20.7.2016 : Nilaini zan
Tantu : Tv. Lalengkima
Thupui : ‘Sual chu Pathian laka helna a ni’
Hawngtu : Pi Lalhmingliani

Dt.23.7.2016 : Inrinni zan
Thusawitu : Pi Lalrinawmi


KRISTIAN THALAI PAWL
Dt.18.7.2016 : Thawhtanni zan
Hruaitu : Nl. R. Zonunmawii,
Committee Member
Tantu : Nl. Lalrintluangi,
Upa Thangkima Group
Thusawitu : Tv. Lalengkima,
Committee Member
Bible reading : Nl. Jenny Zomuankima (B-2)
Zai hruaitu : Tv. Vanlalnghaka
Pionist : Tv. R. Lalnunkima
Thawhlawm khawntu
: Nl. Jessica Lalramnghaki &
Nl. C. Lalhriatpuii


KOHHRAN HMEICHHIA
Dt.19.7.2016 : Thawhlehni zan
Hruaitu : Pi Lalzawni
Tantu : Pi R. Zothanpari
Thusawitu : Pi Lalhmingliani
Khuangpu : Pi Saidingluaii
Pi Zothanpari
Thilpek lakhawmtu
: Pi Lalthannguri


KOHHRAN PAVALAI PAWL
Dt.21.7.2016 : Ningani zan
Chairman : Tv. Lalremliana
Tantu : Pu Lalrindika
Hun hman dan : Sharing


THIAM THIL/NEIH THIL THEHKHAWM
Branch KTP sumtuak nan Thiam thil/Neih thil thehkhawm leh lilam hun a lo hnai leh ta. A hun tur la chiang lo mah se, kan la nei leh dawn a. Hemi atan hian theih tawpin lo inbuatsaih ila. Lilam tur tha tawk lo nei tur leh tlan thei tura lo inbuatsaih turin member-te kan ngen a che u.


DIAMOND JUBILEE PUAL BIBLE CHHIAR CHHUAH
Branch KTP Diamond Jubilee puala pawn lama hriat theih tura Holy Bible chhiarchhuah programme hman tur chu OB Meeting chuan October 10, 2016 (Thawhtanni) zan inkhawm ban atanga hhiar hawnna neih tan nise a ti aa.
Kum danga chuan inkhawm leh Committee leh programme pawimawh bik dangte tih lohvah chuan chatlak awm miah lova chhiar thin a ni a. Tun tumah chuan zan lama dar 10:00 thleng chhiarin a dang chu chhun lama chhiar tum a ni a, kum dang aiin kan chhiar hun chhung hi rei zawk tura ngaih a ni. Member-te lo inkau ila. A chiar inchhawk dan tur leh Group insiam dan tur chu Branch Committee-in a la ruahman dawn a ni.
Hetihrual hian, mimala Holy Bible chhiar chhuakte hnenah kum tawpah lawmman atan Holy Bible tha hi pek tum a ni bawk.


NIHLIAP NGAIHVEN
Fur khua a ni a, kan inkhawm leh Kohhhran thila kan pen chhuahna kawngah Biak In leh Hall velah Nihliap kan keng deuh fur thin a. Kan haw dawna theihnghilh kan awm pawha kan dahna hmunah ngei kan lam leh theih nan mahni nihliap ngei chauh hawn thin ila, kan chiang lo a nih pawhin kan hawn kha kan ta lo a nih chuan dah leh thin ila, a tha hle.


KTP INKHAWM DAN
July 11, 2016 (Mon) zan KTP inkhawm dan :-
Upa Pêngthangvunga Gr. : 20
Upa Kûtdênga Gr. : 12
Upa Thangkima Gr. : 20
Upa Rokûnga Gr. : 19
Junior Gr. : –
Mi dang : 2
Total : 73
Thawhlawm : 935
Mi 1 thawh dan : 12.80

NAUPANG PUAL

THLIRNA
Thil sual ni hauh si lovah chuan kan Pathian biak inkhawma fakna hla bu ken na chang kan hre lo leh, ken tumna kan nei lo hi thil ngaimawhawm ve tak chu a ni tan ta.
“Hla an hril tho va, ken a ngai em ni?” kan ti a ni thei. A dik viau mai. KTP inkhawmah phei chuan hla hril hi engemaw bik tak a nih loh chuan tih tawh loh tum a ni nghe nghe a. Hei pawh hi a chhan berah chuan hla bu ken kan tum lo tual tual nia ngaihna vang a ni.
Kan Kohhran hi hla kan hre tlem em em a, mi veng/kohhrana kan va inkhawm changin an hla thiam thu kan hawn a, thiam tumna pawh kan nei chuang lo va, kan thiam lohvin zah na chang kan hre hek lo, ‘a van kai chaw lo em mai’ kan ti ni fa hmiang!
Hla thiam tam leh tlemin kan thlarau lam nun tihniamin tisang dawn lo mah se, thiam tam lama hmasawn tura tan kan lak hi a pawimawh em em a ni tih kan hriat thar a tha hle mai.
Kan thiam zawng an thlanin namen lovin kan uar a, kan thiam loh an thlanin thiam tumna pawh nei lovin kan lo ding kawisawi vel mai mai bawk a. Hei hi Kohhranho kal hmang tur niin a lang lo. Kan hriat loh leh kan thiam loh thiama zir zela hmasawn hi Pathian Kohhranho zia a ni a, kan tuipui lam thlur bing vak ringawt pawh hi a dik ber lo fo. Hmasawn kan ngai a ni.

THLAI THAR THAWHLAWM
July 17 (Pathianni) hi thlai thar thawhlawm kenkhawm hun a ni a, inkhawm ban lamah lei theih a ni ang.

PRODUCTION STAFF
Editor : Lalkhawmawia
Jt. Editor :
   P.C. Lallawmzuala
David Rualtinkhuma
News Editor :
    Lallawmkimi
Siamthangpuia
A. Lallawmsanga
Cir. Manager :
  Vanlalnghaka
Zonunsanga
Zonunkima