Hlimen the 10th April, 2016 (Pathianni) : Branch KTP Diamond Jubilee puala Sport Week neih mek chu tluang takin a la kal mek a, neih tawh chinah a la hlawhtling hle.

APRIL 5, 2016 (THAWHLEHNI) ZAN
Kohhran Hall-ah hun hmangin Sport Sub-Committee Chairman Tv. Lalchhandama’n Sport hawnna neiin Group tin atangin Beat Contest neih a ni a. Mi talent tak tak kan inhaichhuah phah ta. Music Sub-Committee te’n rawtna an thlen chu a hlawhtling hle.

APRIL 7, 2016 (NINGANI) ZAN 
        Kohhran hall-ah vek hun hman a niin hemi zan hian item hrang hrang Chess, Drough Board, Chinese Checker, Musical Chair leh Computer Games hmanga intihsiak a ni leh a. Computer Games-in lawm a hlawh zual hle. In hnuaia Kohhran Committee nei mek pawh an zahawm hle. Engmah phunselna awm lo va Kohhran Committee-te min hriatthiamnaah kan va lawm em!

APRIL 9, 2016 (INRINNI) CHHUN
Hlimen Games & Sport Association enkawl Hlimen Playground-ah Football, Blind Volleyball, Death Ball, Relay Race, Spoon Race, Sack Race, Vir kuala thil inpet siak hmangtein intihsiak leh a ni a, membere te’n kan hlut leh hle.
Inrinni Sport a hlawhtlin theih nana Field min hmantirtu Hlimen Games Sport Association leh hmanraw pawimawh a tlawna min hmantirtu Vengchhak Football Club-te chungah kan lawm tak meuh meuh a ni.

APRIL 11, 2016 (THAWHTANNI) ZAN
Dar 7:00 PM : Sport kharna inkhawm
A hmun : Kohhran Hall
Hruaitu : Tv. Lalkhawmawia, Treasurer
Bible Quiz : Group tin atangin participants 2
Bible : I & II Korinth  @ Bial Intihsiakna tur
Quiz Master : Tv. R. Lalawmpuia, Leader
Lawmman sem : Hruaitu kutah
Refreshment : Branch kutah

HRIATTURTE:-
1) Position hi Medal Tally hmanga teh a ni ang.
2) Refreshment hi sum enkawltute kutah dah a ni.
3) Thawhtanni zan hian Hall-ah hun hman tur mah nise, hmeichhiain puan bih nise, mipa pawh ho naran lutuka inthuam loh nise.

CHANCHIN TAWI
@ April 16 (Sat) chhun hian Branch KTP sum tuak nan Nl. Zonunmawii, Upa Bial 9-nate in kawtah Blanket su-a hnatlang neih tur a ni.

@ April 4, 2016 (Inkhawm) ban hla zir banah Branch Sport hawnna tur Hall singsa-in Branch Committee hnatlang koh a ni a, kim taka kal nise.

@ April 10 zan inkhawm ban hian Kohhran Zaipawl te’n Bial Inkhawmpui-a hla rem tur hla zir leh tur a ni.

@ Kumin Bial Inkhawm-pui hi Bial Golden Jubilee a nih angin Jubilee Zaipawlpui neih tur a ni a, member turte chu Kohhran Zaipawl tin member-te an ni ang.
Hun remchang hmasa berah a huhova hla hi la zir tur a ni.

@ Branch Sport lawm-man atana Branch Committee te’n sum thawhkhawm tur kha Branch Fin. Secretary hnenah thehluh theuh tur a ni.


@ NPSS thla thum dan zir puanchhuahna neih a ni leh dawn a, department tinte an inbuatsaih tha viau nia thu dawn a ni.

EDITORIAL

“Chumi ni leh thlaah chuan in exam dawn,”an tih hian engnge pawimawh hmasa ber ang le? Thahnemngai taka lehkha zir a nih a rinawm.
‘Khawi room-ah nge ka thut ang, tunge exam veng ang, tu bulah nge ka thut ang, a hnung kilah thu thei ila’ tia ngaihtuah vak vak i chuan, khawiah pawh min thuttir se, huaisen taka exam hmachhawn thei tura inbuatsaih mai kha a him zawk a rinawm.
Kan tunlai zoram thu thar hrang hrang lo piang hian kan nun hi chhungril takin min tibuai a ni tih a lang reng mai! Thu thar hriat chakin kan awm a, hriat lah a nuam em em lo hlawm thei si!
Zoram thim chhah tak lo thleng tur anga an sawi pawh hi lo thleng se, “A kutphah ropui chhungah ka him a ni,” kan tih theih hi a hlu zawkin a rinawm. Kristian ram he ti taka kan buai hi chhut ngun a ngai hle.

Chutiang ti thei tura inbuatsaih pawh a ngai lo, himna kulhpui chu Krista a ni tih hriat leh chutah chuan kan tih ngai lovin a khawngaihna avangin min lo dah reng a ni tih rin mai hi a him tawk a ni..!!

KOHHRAN PAVALAI PAWL RISING DAY LAWM
April 6, 2016 (Nilaini) khan kan Kohhran Pavalai Pawl-te chuan an dincham (Rising Day) an lawm a, nilenga hun hmangin Bialtu Pastor C. Sapkaia leh Represent Upa Rinngaia-te hnen atangin thusawi ngaihthlak a ni.
KTP-te pawh sawm an nih angin an telpui a, Branch aiawhin Tv. P.C. Lallawmzuala, Asst. Secretary leh Nl. Mimi Zohmingmawii-te an tel a, KTP hmingin lawmpuina ` 500/- an hlan. Tlai lamah dincham lawmna ruai tuihnai tak an thehho.

CHHANDAMNA CAMPING BUATSAIH DAWN
Synod Revival Department buatsaihin Dt. 12 – 17.4.2016 chhung hian Synod Camping Centre, Sihphir (Neihbawih)-ah Chhandamna Camping buatsaih a ni dawn a, he Camping-a lut tur hian a tam thei ang ber sawm kan ni.
Speaker : Pu K. Lalawmpuia (Grace Revival Team)
Ken turte : Bible leh note bu leh mut bu
Camp Fee : ` 100/-
Registration : April 11, 2016 (Mon) 4:00 PM

THUVAWN: ROM 2:3

“Aw mihring, chutiang thil ti thinte sawiseltu, nangin chutiang i ti ve bawk si a; Pathianin a sawiselna chu pumpelh i inring em ni?

IV GRADE HNA RUAK

Presbyterian English School, Hlimen-ah IV GRADE hna a ruak a. Dt. 11.4.2016 (Thawhtanni) ral hmain a hnuaia hming tarlante hnenah hian mahni awmna Kohhran lehkha thil telin dilna thehluh theih a ni e.

Hlawh : ` 3,000/- (Fixed)

Chairman : Upa Lalhmuchhuaka

Secretary : Pu J. Lalhlimpuia

KRISTIAN CHHUNGKAW ZAN

April 15, 2016 (Zirtawpni) zan hian Hlimen Pastor Bial chhunga Kohhran pangate chuan zan danglam tak ‘Kristian Chhungkaw zan’ hman leh tur a ni a.

Hei hi kum danga kan lo hman tawh thin ang tho kha a ni a. Chhungtinte, harsatna bik neilote chu hmang vek tura ngen leh beisei kan ni.

Hemi zan hian tul bik thilah lo chuan tumah zan dar 7:00 – 8:00 inkarah inlenpawh, phone-a inbiak loh hram nise.

MASIHI SANGATI MEET

Masihi Sangati Area Meet chu April 16 & 17, 2016 chhung hian Melthum Kohhran Biak Inah hman a ni dawn a. Thupui hi ‘Khawvel mamawh – Isua’ tih a ni dawn a, Speaker-ah Rev. T. Lalhmachhuana, Tuikual South a ni ang.

CHAW VAWI 1 - EIZAT PAWISA

April 11, 2016 (Thawhtanni) zan KTP inkhawmah hian kan inkhawm thawhlawm, ni danga kan pek thin ang hunah khan kan vawi khat chaw ei hen (Kan vawi khat chaw ei man hu pawisa) thawh tura member zawng zawngte beisei kan ni a, tihhlawhtlin theih i tum ang u.

Ni danga kan thawh thin pangngai ang thovin thawhlawm hi lakkhawm tur a ni dawn a, ni danga kan pek thin aiin kan pek tam deuh a ngai dawn tihna a nih chu. A hrangin inkhawm thawhlawm a awm dawn lo va, kha kan pek kha kan inkhawm thawhlawm pangngai ang a ni ang.

Member zawng zawngte tihlawhtling theuh tura kan inngen rualin, remchang lo kan awm a nih pawhin tumah inthlahrun chi a ni lo va, kan thawh zat kha tuman min hriatpui dawn chuang lo. Tin, theihnghilh loh tum ila, kan theihnghilh a nih pawhin tumah inthlahrung lo thung ila.

THLALAK

Diamond Jubilee Souvenir-a thlalak chuang tur Sub-Committee leh Group te’n kan la thehlut kim lo va, a rang lamin thehluh i tum ang u. Tin, Group OB phei chu kan la kim lo hle. Heng bakah hian hruaitu (OB) lo ni tawh thlalak tarlan tum a nih avangin hma la tura tih te’n tan i la thar leh ang u.

SOUND BOX 2 LEH AMPLIFIER

Branch Diamond Jubilee pualin KTP chuan Sound Box lian pahnih leh Amplifier chu a nei thar leh ta a. A pathum man belhkhawm hi ` 1,90,000/- chuang a ni. A dimdawi lamah tan la zel ila.

PROGRAMME

Dt.10.4.2016 : Pathianni Sunday School

Chairman : Pi Zothansiami

Zirlai : Pathian Thlarau leh zawlnei dikte’

Dt.10.4.2016 : Pathianni chawhnu

Thusawitu : T. Upa N. Zokunga

Dt.10.4.2016 : Pathianni zan

Thusawitu : Pu Lalnghakliana

Dt.14.4.2016 : Nilaini zan

Tantu : Pu Lalduhsanga

Thupui : ‘Mihring chu Pathian Vantirhkoh aia hnuai deuh chauhva siam a ni’

Hawngtu : Pu Zosiama

Dt.16.4.2016 : Inrinni zan

Thusawitu : Pu Lalmuanpuia

KRISTIAN THALAI PAWL

Dt.11.4.2016 : Thawhtanni zan

Hun hman dan : Sport kharna inkhawm

Programme : Phek hmaah tarlan a ni

KOHHRAN HMEICHHIA

Dt.12.4.2016 : Thawhlehni zan

Hruaitu : Pi Chawngmawii

Tantu : Pi Vansangkimi

Thusawitu : Pi Sangkhumi

KOHHRAN PAVALAI PAWL

Dt.14.4.2016 : Ningani zan

Hruaitu : Pu Malsawmtluanga

Tantu : Pu Vanmawia

Hun hman dan : Rilrusawi

HRINGNUN

Vety doctor-ah..!

Zirlai hmeichhe pakhat hi a dam lo va, doctor hnenah vawi 4/5 lai an entir tawh hnuah a la dam thei chuang lo va. A nu mangang chuan a fanu hnenah chuan, “Mami, ran doctor hnenah kal mai ang hmiang,” a ti a. A fanu chuan mak ti takin a nu hnenah chuan, “Nu, tinge!?” a ti a.

A nu chuan, “Sakawr angin chak takin class i kal a, thiante nen in inhmuhin ‘zawng’ angin i harh leh a; i hmeichhiatpui i hmuhin ‘vaki’ angin i tawng zawt zawt a; lehkha zir lahin ‘lawi angin’ engmah i hre thei lo va; tlaiah ‘bawng hnathawk zo’ angin hah em em in i lo haw a; chhungte min biak lahin ‘ui kawlh’ ang maiin min ngur chhur chhur a; zanah nise ‘chhimbuk angin’i meng kur a, FB leh Whatsapp khawihin i buai em em a; zing lamah nise ‘vawkpui chaw kham ang maiin’ i mu leh burh burh si a!” a ti a..!

MALARIA LAKAH INVENG RAWH

1. I khua a sik chuan Malaria vang a ni thei tih hria la,     in veng/khuaa  ASHA emaw CHV emaw Sub-Centre emaw Damdawi In hnai berah i thisen exam tir vat ang che.

2. Malaria laka i him theih nan, zan mutnaah thosilen zar hnuaiah ngei mu thin ang che.

3. Malaria laka i him theih nan i inchhung zawng zawng DDT-in kah tir thin ang che.

4. I in leh a vela thosi pianna tuifim tling tibo la, i tuizem phui takin chhin ang che.

5. I tui in atangin Malaria i vei thei lo.

6. Fur laiin Malaria a hluar thin avangin Malaria lakah inveng ngun bik la, i in leh a vel tifai thin ang che.

7. Malaria vanga thihna hi inentir tlai vang a ni fo, damdawi lama thiamna neite rawn vat thin ang che.

Issued by,

District Vector Borne Diseases Control Programme

Aizawl West District

Mizoram, Aizawl

PRODUCTION STAFF

Editor : Lalkhawmawia

Jt. Editor :
P.C. Lallawmzuala

David Rualtinkhuma

News Editor : 
   Lallawmkimi

Siamthangpuia

A. Lallawmsanga

Cir. Manager : 
   Vanlalnghaka

Zonunsang
   Zonunkima