Kohhran Entu 31/1/2016

Buhfaitham
– Zazawni
Secretary
Hlimen Kohhran Hmeichhia

Buhfaitham thilpekah Kohhranin hma sawn zel a, tunah chuan 100%-in kan lo tham thei ta a. Tin, kan chhun khawm pawh thla khatah 2000kg atanga 3000kg a tling hial thin, a ropui a, a lawmawm tak zet a ni. Buhfaitham-a rawngbawl thin chhungkuate Pathian malsawmna tam takin vur mawlh rawh se.
Tin, chhungkaw hrang hrang te’n buhfaitham rawngbawlna kan thawh tling khawm hian hna a thawk nasa hle a ni. Thilpek dang anga ke hran nei a nih loh avangin thilpek zalen a ni a, a tulna hmun apianga pawhfan theih a ni. Mi harsa leh dam lo tanpui nan te, ram chhunga chhiatna, thlipui, kangmei leh leimin avanga chhiatna tawk te; tin, tualthahna rapthlak tak tuarte chhawmdawl nante hman a ni thin a. Tin, ram pawnah kha’ng – Nepal ram lirnghing rapthlak tak tuar te, Myanmar ram tui lian nasa tak tuarte chhawmdawlna Synod hruaitute’n an thehchhuahte kha buhfaitham man tlingkhawm atangtein a ni. Chaw chhum apianga buhfai kan tham thin hmang hian a chunga kan sawi leh kan sawi bak pawh kan lo tanpui thin a ni tih hre thar chungin chhungkaw tin te’n kum 2016-ah hian thahnem i ngai lehzual ang u.
Kan hmasawnna leh buhfaitham hlutna leh tangkaina kan sawi rual hian, kan pek thin dan pawh an inenfiah fo a tul hle. Eng angin nge he rawngbawlna hna ropui tak hi kan pek thin le? Chawlhkar tawp apiangin khawn thin a ni a, khawn a nih avanga pe ve ringawt nge kan nih a, a tulna hriaa pe kan nih?
He thilpek hi khawia mi nge kan pek? Chhungkaw tam tak chuan kan fairel bela mi ni lo, thlei loh kan ei atana kan la tihfai loh atangin kan suak thin a ni mai thei. Hei hi Pathianin eng angin nge a ngaih ang le? Pathian chuan a fapa neih chhun chhandam nan min pek mai duh tawk lovin, nitin kan mamawh engkim min pe a. Hemi chhan let ve nan hian kan duh lai ngei pek ve hi a va tha-in a va hlu dawn em! Pathian hmangaihna kan rulh sen ngai loh tur chhan let ve na a ni si a.
Chhung tinah hian a chengte hian ta bik/pual bik kan nei theuh mai. Kan inah hian Pathian chanpual kan siam ve em? Mi in chhunga kan luh a, fairel bel bula buhfaitham bel, a pangah ‘BUHFAITHAM – LALPA CHANPUAL’ tih inbel va mai han hmuh hi a nuamin a zahawm hle. A neitute’n Pathian an dah pawimawhzia a lang hle mai. Tin, chawlhkar tawpah kan han la khawm a, a bel atang ngeia han teh chhuahte hi a tam emaw, a tlem emaw, Lalpa chanpual a nih avangin a hlut dan a va dang em!
Buhfaitham rawngbawlna kan ngai pawimawh ta sa sa, Lalpa tan bawm siamin chaw kan chhum apiangin Lalpa, engkim min petu chhum kep nan, bawmah ngei i tham thin ang u khai. Buhfaitham rawngbawlna hi Lalpa ngaihin hlu tak a ni si a!
Amah ngeiin, “Englo lak aiin pekin lukhawng a nei zawk,” a tih kha (Tirhkohte Thiltih 20:35).
CHANCHIN TAWI
@ Bial KTP Conference minute, report leh sermon bu chu peih a ni ta a. Branch Secretary Pu A. Lallawmsanga hnenah a lam theih ang.

@ 2016 – 2017 KTP Kumpuan bu hi a chhuah veleh Information & Publicity Sub-Committee chuan member-te lei theih tura hma lak a tum.

@ Bial KTP Conference thlen hma khan Kohhran chuan Inkhawmpuia kan mamawhna phuhru turin FM Microphone 2 an lei thar leh.

@ Kohhran Hall rawng hnawih chu chhunzawm zel a ni a, a lang lam chu hnawih kim a ni thawkhat tawh a, Hall hnung lam pawh theih ang anga siam mek zel a ni.
Tin, Kohhran Hall light pawh siam a ni a, tunah chuan zan lama programme hman dawn pawhin light tha tak hnuaiah engkim a tih theih  tawh e.

@ Kum 2016 chhunga Section YMA hrang hranga hruaitu (OB)-te, January 29, 2016 zan khan thlan an ni.

@ January 29, 2016 (Zirtawpni) zan khan Melthum Masihi Sangati-te chuan kan Kohhran Masihi Sangati-te an rawn tlawh.

Thuvawn : Matthaia 6:6“Nang erawh chu i tawngtaiin, i pindan chhungrilah lut la, i kawng khar la, i Pa a ruka awm hnenah chuan tawngtai rawh; tichuan, i Pa a ruka hmu thintu chuan a rul ang che.”

EDITORIAL
Kumin (2016) hi kan Bial tan mai piah lamah a bik takin kan Kohhran tan chuan mellung pawimawh tak a ni niin a lang. Kumin chu ‘Jubilee kum’ a ni ringawt mai!
January thlaah Bial KTP Golden Jubilee kan dawng a, February thlaah Bial Hmeichhe Golden Jubilee, April thlaah Bial Golden Jubilee; chutiangin, June thlaah Hlimen Branch KTP Diamond Jubilee kan lawm dawn bawk a ni a. Heng hun hmang leh thleng theia Pathian malsawmna kan dawng leh hmang ve theia damna leh hriselna kan nei hi kan vannei tak meuh meuh a ni, Pathian hnenah lawmthu i sawi mawlh mawlh ang u.
Bial KTP kha kan Kohhranin kan dawn kum pangngai a ni a, a dang hi chu Bial Station kan nih avanga dawng kan ni a. Phunnawi lovin, lungawi takin, thahnemngai takin, Bial rilru pu rana kan lo dawnsawn a pawimawh hle a ni.
  Kan chet that paw’n ‘Bial tih awm reng’, kan chet chhiat hlauh chuan ‘Bial neitu ni ve si’ tih kan ni dawn tih hre rengin mahni zawnah theuh thahnemngai takin i bei hram hram ang u. Kan kova nghah hi a te lo theuh tih hriain tan i la zual sauh sauh ang u.

Hlimen pastor bial kohhran hmeichhe inkhawmpui vawi 51-na

Agenda
Hlimen the 31st January, 2016 (Pathianni) : Hlimen Pastor Bial Kohhran Hmeichhe Inkhawmpui Vawi 51-na leh Bial Kohhran Hmeichhe Golden Jubilee ni bawk chu Dt. 11th – 14th  January, 2016 chhung hian kan Kohhran hman a ni dawn a.

He Inkhawmpuia Agenda turte :-

1. 2017 Bial Hmeichhe Inkhawmpui Programme pawmna :-
A hun : February 10 – 12, 2017
A hmun : Hlimen Damveng Kohhran Biak In
Thupui : ‘In kawngte chu chhut ngun rawh u’ (Hagaia 1:5)

2. Mizoram Presbyterian Kohhran Hmeichhe Rorel Inkhawm palai kal tur leh kal man tur

3. Bial Buhfaitham ziaktu rawtna

4. General :-

1) “Bialin Hmangaihna Ina naupang pakhat kan chawm hi kum 2016 chhung atan pakhat chawm belh ni rawh se.”
– Hlimen Kohhran 

2) “Hlimen Pastor Bial Kohhran Hmeichhe Golden Jubilee hriatreng nan Women Centre-ah Steel Almirah (Godrej) pek ni rawh se.”
– Hlimen Kohhran 

3) “Kristian Chhungkaw Campaign Bial hruaitute’n Kohhran tinah neih ni rawh se.”
– Melthum Kohhran 

4) “Bial huapin Kohhran Hmeichhe Ni hman ni rawh se.”
– Melthum Kohhran 

5) “Bial Hmeichhia te’n thilpek pe-in Home eng emaw ber tlawh ni rawh se.”
– Saikhamakawn Kohhran 

6) “Bial huapin Kristian Chhungkaw Zan hman ni rawh se.”
– Saikhamakawn Kohhran 

7) “Bial Buhfaitham ziaktute hian Buhfaitham khawnna bu hi kumthar hmain Kohhran tinah sem chhuah thin ni rawh se.”
– Hlimen Damveng Kohhran 

8) “Inkhawmpui chhung hian Hmangaihna In pualin thawhlawm bawm dawh ni rawh se.”
– Bial Committee 

9) “Kum 2016 chhungin Central hruaitute sawmin Kristian Chhungkaw Campaign leh Leadership Training Bial huapin neih ni rawh se.”
– Bial Committee 

10) “Bialin Tirhkoh 5 (panga) kan chawm hi chawm chhunzawm leh ni rawh se.”
– Bial Committee

5. Reports :-
a) Kum 2015 January – December Buhfaitham report
b) Finance Report

6. Bial Budget
Chanvo nei tur
February, 2016 chhunga chanvo neitu turte :-
Meeting Chairman : Upa Lalengliana
Khuangpu : Pu Chhuanvawra
Pu H. Lallawmsanga
Pianist : Tv. Lalawmpuia Hauzel
Thawhlawm khawntu : 
                     Nl. Lalengzami
Nl. Zoremtluangi
Nl. Lalruatmawii
Nl. Zosiampari

Pathian ram lakkhawm
February thla chhunga Upa Bial tina Pathian ram lakkhawm hun hi Bial Hmeichhe Inkhawmpui lai a ni a, lakkhawm leh chhiar thu hla-ah Kohhran Committee thuchhuak lo ngaihchan nise.

Kohhran pavalai pawl hriattirna
Kohhran Pavalai Pawl te’n khawhar inah tawngtai inkhawm neih tur a ni a, ngai pawimawh tura ngen an ni.
A hun : February 1, 2016 (Thawhtanni) 6:30 PM
A hmun : Pu Lalchungnunga In c/o Pu Zoramthanga
Hruaitu : Pu Thanthuama
Tin, February 2, 2016 (Thawhlehni) zan dar 6:30 hian February thla Committee neih tur a ni a. Kohna sem a ni dawn lo va, hei hi kohnaa ngaih tur a ni ang.

Kohhran hmeichhe hriattirna
February thla Kohhran Hmeichhe inkhawma khuangpu turte :-
Pi Chawngmawii leh Nl. Lalnipuii
Thilpek lakkhawmtu :- Pi Zohlunsangi
Kohhran Hmeichhe member zawng zawng te’n January 31, 2016 (Pathianni) Sunday School banah  Kohhran Hall-ah Inkhawmpuia rem tur hla zir tur a ni a, member a tam thei ang ber kal tura ngen an  ni.

Conference tanpuina
Bial KTP Conference kan hman zawh takah tanpuina hetiangin dawn a ni :-
1) Bial KTP Committee atangin ` 1,500/-
2) Bial KTP Committee atangin Sound pual ` 3,000/-
3) Melthum Branch atangin ` 1,000/-
4) Saikhamakawn Branch atangin ` 2,000/-
5) Hlimen Damveng Branch atangin ` 1,500/-
6) Hlimen Vengthar Branch atangin ` 1,000/-
A vaia kan dawn – ` 10,000/-

Golden Jubilee lawmpuina
Bial KTP Golden Jubilee hman zawh takah khan min hringtu Mission Veng Pastor Bial-te sawm an ni a. Anni hnen atang hian Bial KTP-in lawmpui nan Citation tha tak kan dawn a. Tin, Bial Kohhran Pavalai Pawl pawh sawm an nih angin an rawn tel a, Citation tha tak kan dawng bawk.

PROGRAMME
Dt.31.1.2016 : Sunday School
Tantu : Pi Lalfakzuali
Zirlai : ‘Pathian thlarau leh thilsiam’
Khaikhawmtu : T. Upa N. Zokunga

Dt.31.1.2016 : Pathianni chawhnu
Thusawitu : Upa Vanlalzuia

Dt.31.1.2016 : Pathianni zan
Thusawitu : Upa Lalhmuchhuaka

Dt.3.2.2016 : Nilaini zan
Tantu : Pu Lalhmingmawia
Thupui : ‘Mihring mihrinna chawisangtu (Humanist) hovin mihring an sawi dan’
Hawngtu : Pu R. Hmingthansiama

Dt.6.2.2016 : Inrinni zan
Thusawitu : Pi Zothanpari

kristian thalai pawl
Dt.1.2.2016 : Thawhtanni zan
Hruaitu : Pu H. Lallawmsanga,

Committee Member
Tantu : Nl. Laltlanmawii
Upa Thangkima Group

Hun hman dan : Branch Finance report &
Group tin Secretary report

Thuchah tawi : 
Nl. K. Lalrinchhani
Nl. Lalrinkimi
(Missionary-a kal turte)
Bible Reading : Tv. Laldawngliana (B-4)
Zai hruaitu : Tv. Siamthangpuia
Musician : Tv. Zarzokima
Tv. Zonunkima
Hla hriltu : Nl. Lallawmkimi
Thawhlawm khawntu: Nl. Lalruatmawii
Nl. Zosiampari

kohhran hmeichhia
Dt.2.2.2016 : Thawhlehni zan
Hruaitu : Pi Zonunkimi
Tantu : Pi Lalchangliani
Hun hman dan : Rilru sawi
Inkhawm banah Upa Bial 8-na ter’n Bethel neih tur a ni ang.

kohhran pavalai pawl
Dt. 4.2.2016 : Ningani zan
Hruaitu : Pu Lalhmangaiha
Tantu : Pu Lianhmingthanga
Thusawitu : Pu K. Pakunga

Group hmachhawp
Upa Kûtdênga Group : February 2 & 4, 2016-ah Group sumtuak nan hnatlang neih an tum a. January 5, 2016, zan lamah Branch KTP Committee-in rem a tih chuan veng pawn lamah Group sumtuak nan tho hnatlang neih tumin ruahmanna an siam mek. Member a tam thei ang ber hnatlang turin an insawm.
Upa Rokunga Group : January 30, 2016 khan Group sumtuak nan lei laiin hnatlang an nei a. Kar leh chho hun remchangah Group member tlawhchhuah programme hman tumin ruahmanna an siam.
Upa Pengthangvunga Group : Kar leh chho hun remchangah Pu Lalhmingmawia, Quarry-te inah kawtah Group sumtuak nan hnatlang neih an tum. January 4, 2016 (Ningani) zan hian member tlawh chhuah pahin Group sumtuak nan Bookmarh an siam chu zawrhchhuah an tum.
Upa Thangkima Group : February 4, 2016 (Ningani) zan hian Kumthar ruahmanna neia Executive Committee hmasa ber neih an tum.

lawmthu sawina
Bial KTP Conference Vawi 51-na kan dawn leh Bial KTP Golden Jubilee kan lawm takah heng a hnuaia mite hnenah hian lawmthu kan sawi tak meuh meuh a ni :-
1) Min hruaitu – Kan Pathian hnenah
2) Kawng engkima kan pa – Kohhran Committee chungah
3) Sub-Committee leh a hnuaia member zawng zawngte hnenah
4) Branch aiawha chanvo tihlawhtlingtu zawng zawngte hnenah
5) Refreshment & Sanitation Duty – Denior Department zirlaite hnenah
6) Mikhual dawngtu leh dawng tura lo inbuatsaih zawng zawngte
7) Traffic & Security min thawhsaktu – Hlimen Branch YMA-te chungah
8) Biak In leh Hall hualtu chhungkua zawng zawngte hnenah
Sd/-
( A. Lallawmsanga )
Secretary
Kristian Thalai Pawl
Hlimen Branch

Bial ktp committee
February 2, 2016 (Thawhlehni) zan dar 6:30 hian kan Kohhran Committee Room-ah 2016 – 2017 Bial KTP Committee vawi 1-na neih a ni dawn a. Hetah hian kan Conference-a rorela kan passed takte an bawhzui nghal ang. Thingpui lo lumsak turin Refreshment Sub-Committee-te ngen leh beisei an ni.

THLIRNA

Kum a lo thar a. Jubilee lawm leh hmang reng rengin kan phek phelen nasa tan hle. Kan hmaa lum a ni tih kan hriat sa mah nise, a hun a lo thlen meuh chuan kan duh angin a tu-ate pawh kan inbuatsaih tha hman lo niin a hriat ber mai! Hun ropui a nih vangte pawh a ni ang. Heng Jubilee kan alwm hian eng rilru nge kan put le? Jubilee chuan a kum chuti zatna a thlen tak avanga hlim leh lawm taka hmang nge kan nih, Jubilee a nih ang ngeia saltangte chhuah zalenna dar kan khawng nge inremna Jubilee atana hmang, nge inrem lohna hun atan kan lo hmang hlauh thung?

Heng hun kan hmang thei hi Pathian malsawmna, kan hruaitu hluite lo tih tauh tauhna a ni tih kan theihnghilh loh a tha thin hle. Kan hruaitu hmasate khan hun harsa leh khirh tak tak paltlangin hma an lo la thin a, keini’n a rah kan seng ta hlauh a nih hi. Pastor Bial a din tirh phei chuan rambuai kum a nih avangin thil tih a harsa ang tih a lang reng. Vawiinah, engmah harsatna, min nghawng chhe thei thil a awm loh pawhin kan ti hlei thei lo a ni a! Thangtharte hian kan hruaitu hluite hma min lo laksakna hi kan thinlungah i vawng reng ang u. Anni zara heng hun hi thleng thei kan ni si a! Kan hma kum 10 lo awm turah (Pathian zara kan dam chuan) hetiang hun deuh tho hi kan la lawm leh dawn a ni a. Thang lo thar leh zelte tan hian eng rohlu nge vawiin thawk mekte hian kan neih ang le? Rah duhawm tak chhuah thei tura vawiina a par kan chhuan a ngai tih i theihnghilh lo ang u.

PRODUCTION STAFF

Editor     : Lalkhawmawia
Jt. Editor : P.C. Lallawmzuala
H. Lalbiaksanga
News Ed. : Lallawmkimi (B-2)
Siamthangpuia
A. Lallawmsanga
Cir. Man. : Vanlalnghaka
Zonunsanga
Zonunkima